2026 жылғы 29 мамырда Азия елдері арасында өзара іс-қимыл және сенім шараларын күшейту жөніндегі Кеңес хатшылығының делегациясы Ақмола облысының Ақкөл қаласындағы арнаулы әлеуметтік қызметтерге мұқтаж балаларды қолдау орталығына іс-сапармен барды.
Сапар барысында қайырымдылық қаражаттарын тапсыру рәсімі өтіп, балалар орталығының қызметімен танысу ұйымдастырылды. Қазіргі таңда орталықта 3-тен 18 жасқа дейінгі 132 бала тәрбиеленуде.
Қаражат 2026 жылғы 26 сәуірде Астанадағы Азия елдері арасында өзара іс-қимыл және сенім шараларын күшейту жөніндегі Кеңес хатшылығының штаб-пәтерінде сәтті өткен көктемгі қайырымдылық жәрмеңкесінің арқасында жиналды. Жәрмеңке дипломатиялық қауымдастықты, халықаралық серіктестерді және қоғамның кең бөлігін ортақ игі мақсатқа біріктірді.
Ақмола облысы білім басқармасының орынбасары Жанаргүл Баймақова өз сөзінде бұл шараның маңыздылығын атап өтіп, қонақтарға 5 миллионнан астам теңгені құрайтын сертификатты табыстағаны үшін алғыс білдірді. Сондай-ақ, орталықтағы мамандардың балалармен нәтижелі және адал жұмыс істеп келе жатқанын атап өтіп, оларға шынайы ризашылығын білдірді. Балаларға емтихандарын сәтті тапсырып, жазғы шырайлы демалыс тілей отырып, оларға жылы лебізін жеткізді.
Қаржылай қолдау орталықтағы жазғы лагерьді жаңғыртуға бағытталады. Бастаманың мақсаты – балаларға демалыс және сауықтыруды нығайту үшін ыңғайлы әрі заманауи жағдай жасау. Аталған мекеменің таңдалуы көктемгі жәрмеңкені ұйымдастыру кезеңінен бастап Ақмола облысы әкімдігімен тығыз ынтымақтастықтың нәтижесі болды. Бірлескен кеңестер барысында жазғы маусым алдында қолдаудың ең өзекті болатын орталық дәл осы мекеме болып анықталды.
