Щучинск қаласында орналасқан «Центр плова» дәмханасында болған газ-ауа қоспасының жарылысы салдарынан зардап шеккендерге медициналық көмек көрсетілуде. Оқиға 26 ақпан күні кешкі уақытта орын алды.
Ақмола облыстық денсаулық сақтау басқармасы басшысы Нариман Ермектің мәліметінше, 26 ақпан күні сағат 22:01-де Бурабай аудандық ауруханасы қабылдау бөліміне аталған дәмханадан газ-ауа қоспасының жарылғаны туралы шақырту түскен.
Зардап шеккендерді оқиға орнынан эвакуациялау жұмыстары Қазақстан Республикасы Төтенше жағдайлар министрлігі қызметкерлерімен бірлесіп жүргізілді. Оқиға орнына жедел жәрдемнің төрт бригадасы жіберіліп, алғашқы медициналық көмек дер кезінде көрсетілді.
Өкінішке қарай, апат салдарынан оқиға орнында бес адам қаза тапты. Тағы екі адам ауруханаға жеткізілген кезде көз жұмған.
Қазіргі уақытта дәрігерлер зардап шеккендердің өмірін сақтап қалу үшін барлық қажетті шараларды қабылдауда. Щучинск аудандық ауруханасының жансақтау бөлімінде жағдайы ауыр және аса ауыр халдегі төрт науқас жатыр. Сонымен қатар үш адам травматология бөлімінде ем қабылдауда, ал сегіз адам амбулаториялық бақылауға жіберілген.
Медициналық көмекті күшейту мақсатында алты науқас Көкшетау қаласындағы көпсалалы облыстық ауруханаға эвакуацияланды.
Дәрігерлердің айтуынша, барлық зардап шеккендерге қажетті ем-дом толық көлемде көрсетіліп жатыр. Тиісті қызметтер оқиғаның себеп-салдарын анықтау жұмыстарын жалғастыруда.
