Республика күні қарсаңында Көкшетау қаласында тұрғындарға арналған тиімді ұсыныстар мен жаппай сатылымдар ұйымдастырылды. «Republic Day» және «Bereke Fest» республикалық акциялары аясында азық-түлік пен күнделікті тұрмысқа қажетті тауарларды жеңілдетілген бағамен сатып алуға болады.
Акциялар 17 қазанда басталып, 27 қазанға дейін жалғасады. 21–27 қазан аралығында арнайы ұсыныстардың белсенді кезеңі өтуде. Жекелеген тауар түрлеріне 10%-дан 50%-ға дейін жеңілдіктер қарастырылған. Ақмола облысында бұл бастамаға 20-ға жуық сауда нысаны қатысып отыр. Олардың қатарында сауда орталықтары, супермаркеттер мен базарлар бар.
ҚР Сауда және интеграция министрлігі Сауда және тұтынушылардың құқықтарын қорғау департаментінің Ақмола облысы бойынша басшысы Самат Сайдалиннің айтуынша, акциялардың басты мақсаты – халықтың қажетті тауарларға қолжетімділігін арттыру, ішкі сауданы қолдау және отандық өнімдердің сауда айналымын кеңейту.
«Акциялар тұрғындарға қажетті тауарларды тиімді бағамен сатып алуға мүмкіндік береді. Сонымен қатар, бұл бастама тұтынушылық сұранысты қолдауға және ішкі сауданың дамуына серпін беруге бағытталған», – деді Самат Сайдалин.
Акция аясында сауда орындары да өз тұтынушыларына арнайы ұсыныстар әзірлеген. Мәселен, «Союз» сауда желісінің дүкендерінде бірқатар азық-түлік пен тұрмыстық химия өнімдеріне 20%-дан 50%-ға дейін жеңілдіктер енгізілген.
«Біз тұрғындарға қызықты әрі тиімді ұсыныстар жасадық. Жеңілдіктер жармалар, макарон өнімдері, тәттілер, шұжық өнімдері, сусындар мен шырындарға, сондай-ақ тіс пасталарына, сусабындарға және тазалық құралдарына қолданылады. Тұрғындарды осы мүмкіндікті пайдаланып, қажетті тауарларды тиімді бағамен сатып алуға шақырамыз. Акцияға қатысатын өнімдер туралы ақпаратты әлеуметтік желідегі парақшамызда жариялап отырамыз», – деді сауда желісінің коммерциялық директоры.
Айта кетейік, «Republic Day» және «Bereke Fest» акциялары 27 қазанды қоса алғанға дейін жалғасады. Акцияға қатысатын сауда нысандары мен арнайы ұсыныстар туралы толық ақпаратты Ақмола облысы әкімдігінің ресми интернет-ресурсынан алуға болады.
