Жаз – жастар үшін тек демалыс уақыты ғана емес. Бұл мезгіл – еңбекке араласып, тәжірибе жинап, елге қызмет ететін шақ. «Жасыл ел» бағдарламасы жыл сайын мыңдаған жасқа осындай мүмкіндік сыйлайды. Олар көгалдандыру, тазалық, абаттандыру жұмыстарымен айналысып, туған жерін көркейтуге өз үлесін қосады. деп хабарлайды Nayzakokshe.kz тілшісі.
Алайда биыл Ақмола облысының Есіл ауданында еңбек еткен бір топ жас күтпеген қиындыққа тап болды. Бір ай бойы Двуречное ауылында жұмыс істеген олар өз еңбекақыларын әлі күнге дейін ала алмай жүр.
«Бір ай еңбектендік, ақысы жоқ»
Есіл қаласының студенті Иван Макаров сол жастардың бірі. Ол жаз бойы «Жасыл ел» құрамында ауылды көркейтуге атсалысқан.
«Бізбен аудандық орталық арқылы келісімшарт жасалды. Мердігер компания Қызылорда облысынан екен. Бір ай бойы күннің ыстығына қарамай жұмыс істедік. Еңбекақы 85 мың теңге болады деп уәде берді. Бірақ ақша түскен жоқ. Әкімдікке де бірнеше рет бардық, бірақ нақты нәтиже болған жоқ», – дейді Иван.
Бұл мәселе тек бір ауылмен шектелмейді. Есіл қаласында еңбек еткен жастар да осындай жағдайға тап болған. Барлығы да уәде етілген еңбекақыны күтіп отыр.
Ресми түсініктеме
Есіл аудандық ішкі саясат, мәдениет және тілдерді дамыту бөлімінің мәліметінше, «Жасыл ел» жобасы мемлекеттік әлеуметтік тапсырыс аясында жүзеге асқан.
2025 жылғы 9 шілдеде мемлекеттік сатып алу порталы арқылы жобаға конкурс жарияланып, нәтижесінде Қызылорда облысы, Қазалы ауданы, Әйтеке би кентінде тіркелген «Қармақшы жастары» жастар қоғамдық бірлестігі жеңімпаз деп танылған.
Келісімшартқа сәйкес, мердігер ұйым жастардың жалақысын 10 қыркүйекке дейін төлеуге міндетті болған. Алайда бұл міндет орындалмаған.
Қазіргі таңда аудандық бөлім мердігер ұйымға ресми талап-хат жолдап, келісімшарт талаптарын орындауды міндеттеген. Сонымен бірге, жастардың құқықтарын қорғау мақсатында сотқа талап арыз берілген.
«Жасыл елдің» идеясына көлеңке түспесін
«Жасыл ел» – елдің болашағына бағытталған әлеуметтік бастама. Оның мақсаты – жастарды еңбекке баулу, туған жерге сүйіспеншілігін арттыру, табиғатты қорғауға үндеу.
Бірақ мұндай жағдайлар жастардың мемлекеттік бағдарламаға деген сенімін азайтады. Бүгінгі уәде орындалмаса, ертең бұл іске ынтамен қатысатын жастар табыла ма?
85 мың теңге – үлкен сома емес, бірақ студент үшін оның әр тиыны маңызды. Бірі жатақхана мен жол ақысына жұмсайды, бірі оқуына, тамағына пайдаланады.
Мәселе тек жалақыда емес. Бұл – еңбекке деген құрмет пен әділдіктің өлшемі.
Жастардың үміті үзілмесін
Биылғы жағдайдан сабақ алынуы тиіс. Егер келісімшарттағы міндеттемелер уақытында орындалмаса, жастардың еңбегі бағаланбаса, «Жасыл елдің» рухы мен маңыздылығы әлсірейді.
Еңбекке құрмет – елдің дамуының негізі. Ал жастардың еңбегін қорғау – билік пен қоғамның ортақ міндеті.
Келер жылы жаңа еңбек маусымы басталғанда, бұл мәселе толық шешімін тауып, жастар өз еңбегіне лайық ақы алатынына сенгіміз келеді.
