Ақмола облысында алқабилер соты 22 жастағы ер адамды әріптесін өлтіргені үшін кінәлі деп таныды. Айыпталушы У. ҚР Қылмыстық кодексінің 99-бабының 1-бөлігі бойынша («Кісі өлтіру») жауапқа тартылды. Іс алқабилердің қатысуымен қаралды.
Тергеу материалдарына сәйкес, оқиға 2025 жылдың мамыр айында болған. 22 жастағы У. мен оның әріптесі К. жұмыстан кейін У.-дың көлігімен үйге қайтып бара жатқан. Жол үстінде екеуінің арасында жанжал туындап, олар гараждардың маңында тоқтап, қарым-қатынасын анықтамақ болған.
Жанжал барысында К. жерден пышақ алып, оны сермей бастаған. Сол сәтте У. қарсыласына тап беріп, оны мойнынан қысып тұншықтырған. Кейін пышақты тартып алып, К.-ның мойын тұсына бірнеше рет соққы жасаған.
Осыдан кейін У. мәйітті орманды алқапқа апарып, топырақпен көміп тастаған, ал өз көлігіндегі қанды іздерді жасыру үшін автомойкада тазалап шыққан.
Бір апта өткен соң айыпталушы өз еркімен полицияға барып, кінәсін мойындап, мәйіттің жатқан орнын көрсеткен.
Оның кінәсі өзінің мойындау көрсетпелерімен, оқиға орнын қарау хаттамасымен, сараптама қорытындысымен, бейнебақылау камераларындағы жазбалармен және басқа да айғақтармен дәлелденді.
Алқабилер соты айыпталушыны кінәлі деп танып, үкім шығарды. Жаза тағайындау кезінде сот айыпталушының өз еркімен полицияға барғанын және жас екенін ескеріп, бұл жайттарды жазаны жеңілдететін мән-жай ретінде қабылдады.
Сот үкімімен У.-ға 10 жыл бас бостандығынан айыру жазасы тағайындалды. Сонымен қатар, сот шешімімен марқұмның кәмелетке толмаған балаларына 7 млн теңге, әкесіне 7 млн теңге, материалдық және өкілдік шығын ретінде 1,5 млн теңге өтемақы өндіру міндеттелді.
Аталған сот үкімі әлі заңды күшіне енген жоқ.
Ақмола облысы бойынша мамандандырылған ауданаралық қылмыстық істер жөніндегі соттың ақпараты негізінде дайындалды.
