Ұстаз – ұлттың болашағын қалыптастыратын ұлы тұлға. Мұғалімдер күніне орай Ақмола облысында білім саласының майталмандарына арналған салтанатты жиын өтті. Шара «Болашақ» сарайында ұйымдастырылып, оған облыс әкімі Марат Ахметжанов қатысты.
Мерекелік жиынға өңірдің 500-ге жуық педагогы, білім беру ұйымдарының басшылары, ардагер ұстаздар мен ведомстволық мекемелер өкілдері жиналды.
Өз құттықтау сөзінде аймақ басшысы ұстаз еңбегінің қоғамдағы рөліне тоқталып, білім саласының басты тірегі – мұғалім екендігін атап өтті.
– Әр адам өмірінде рухани жетілуіне, жан-жақты дамуына, тұлға болып қалыптасуына ықпал еткен ұстазын ерекше құрметпен еске алады. Ұлы Абай: «Ұстаздық еткен жалықпас, үйретуден балаға», – деп айтқандай, қай кезеңде болмасын ұстаздық – ең асыл міндет. Мемлекет басшысы Қасым-Жомарт Кемелұлы Тоқаев та педагог мамандығының ұлы миссия екендігін атап өткен болатын. Шындығында, ұстаздың еңбегі – ұлттың болашағына қаланған іргетас. Бүгінгі жетістіктеріміздің бәрінде мұғалімнің маңдай тері мен мейірімі жатыр, – деді Марат Ахметжанов.
Бүгінгі таңда Ақмола облысында мектепке дейінгі, орта, техникалық және кәсіби білім беру ұйымдарында 23 мыңнан астам педагог қызмет етеді.
Салтанатты жиын барысында бірқатар ұстаздар министрлік пен облыстық деңгейдегі марапаттарға, алғыс хаттар мен ақшалай сертификаттарға ие болды.
Атап айтқанда, Степногорск қаласындағы №9 мектептің бастауыш сынып мұғалімі Карлығаш Сүлейменова «Педагогтің кәсіби міндеттерін үлгілі орындағаны үшін» құрметті атағына ие болып, 3 млн 145 мың теңге көлемінде сертификатпен марапатталды. Ал Көкшетаудағы Мәлік Ғабдуллин атындағы мектептің мұғалімі Жұлдыз Уәлиева «Педагогтің адал еңбегі үшін» атағына лайықталып, 1 млн 966 мың теңге көлеміндегі сертификатқа қол жеткізді.
Бұл мереке – әрбір ұстаздың еңбегіне көрсетілген құрметтің ғана емес, қоғамдағы ұстаз мәртебесінің артып келе жатқандығының айқын дәлелі.
