Біржан сал ауданының орталығы – Степняк қаласында бірнеше аптадан бері бос тұрған мемлекеттік тудың тұғыры қайта жөнделіп, көк ту орнатылды.
Бұған дейін аудан әкімдігі ғимараты жанындағы тұғырда мемлекеттік рәміздің болмауы тұрғындар мен әлеуметтік желі қолданушыларының наразылығын туғызған еді. Елдің айбыны саналатын тудың болмауы жұртшылықты алаңдатпай қоймады.
Аудан әкімдігі жағдайға қатысты ресми түсініктеме беріп, тұғырда техникалық ақаулар анықталғанын хабарлаған болатын.
«Бағыттаушы тетіктің сынуы мен тростың тозуы ту орнатуға мүмкіндік бермеді. Қазіргі уақытта жөндеу жұмыстары толық аяқталып, мемлекеттік ту қайта орнатылды», – делінген әкімдіктің хабарламасында.
Бүгінде Степняк аспанында көк ту қайта желбіреп тұр. Бұл – елдіктің, бірліктің және тәуелсіздіктің нышаны.
Аудан тұрғындары үшін бұл оқиға ерекше мәнге ие.
«Көк туымыздың орнына қайта оралғанына қуаныштымыз. Мемлекеттік рәмізге құрмет – елге деген құрмет», – дейді тұрғындар.
Айта кету керек, соңғы күндері өңірде жылу маусымына дайындық мәселесі де қызу талқыланып отыр. Тұрғындар ендігі кезекте жылу жүйесіндегі түйткілдер уақытылы шешімін табарына үміт білдіруде.
Көк туымыз әрқашан биікте желбіреп, еліміздің мерейі арта бергей.
