Ақмола облысының Ерейментау ауданында жеті адам жаппай улану белгілерімен ауруханаға түсті, деп хабарлайды Nayzakokshe.kz тілшісі облыстық полиция департаментіне сілтеме жасап.
Алдын ала мәлімет бойынша, зардап шеккендер аудандық аурухананың инфекциялық бөліміне жеткізілген. Дәрігерлер олардың тағамнан улануы мүмкін екенін анықтады.
Белгілі болғандай, уланғандардың барлығы бір шараға қатысқан. Оқиға туралы ақпарат түскен соң, учаскелік инспектор тиісті қызметтерге хабар берген.
Қазір бұл факті бойынша ҚР Қылмыстық кодексінің 304-бабы — «Санитарлық ережелерді немесе гигиеналық нормативтерді бұзу» бойынша сотқа дейінгі тергеу амалдары жүргізіліп жатыр.
Құқық қорғау органдары уланудың нақты себебін және оған жауапты адамдарды анықтауда.
Полиция өкілдері тұрғындарға санитарлық талаптарды қатаң сақтауды еске салды.
«Санитарлық және гигиеналық нормаларды сақтау – әрбір азаматтың міндеті. Мұндай талаптарды елемеу адам денсаулығы мен өміріне қауіп төндіреді», – деді ведомство өкілдері.
