«ALAN» дене шынықтыру-сауықтыру кешенінде Ақмола облысының қыздар арасындағы волейболдан күзгі чемпионаты алғаш рет Қосшы қаласында басталды. Жарыстар «ALAN» кешені мен Қосшы қаласының Қоғамдық мәдени-спорт кешенінде өтуде. Чемпионат 28–30 қараша аралығында жалғасады.
Байрақты бәсеке екі жас санаты бойынша ұйымдастырылған: 2009–2010 жылдары туған қыздар және 2011–2012 жылдары туған спортшылар өзара шеберлік байқасуда.
Чемпионаттың негізгі мақсаты – жас волейболшылардың кәсіби дамуына қолдау көрсету, салауатты өмір салтын насихаттау және спортқа, әсіресе волейболға қыздардың қызығушылығын арттыру.
28 қараша күні сағат 12:00-де «ALAN» кешенінде чемпионаттың ресми ашылу салтанаты өтті. Іс-шара барысында Қосшы қаласы ішкі саясат, мәдениет, тілдерді дамыту және спорт бөлімінің басшысы Айнагүл Көңбайқызы құттықтау сөз сөйлеп, қатысушыларға сәттілік тіледі.
Чемпионатқа Корғалжын, Целиноград, Есіл, Шортанды, Ерейментау, Астрахан, Ақкөл аудандарының балалар мен жасөспірімдер спорт мектептері, сондай-ақ Зеренді ауданының «Жігер» БЖСМ, Көкшетау, Степногорск және Қосшы қалаларының құрамалары қатысуда.
Жарыстың қорытындысы 30 қараша күні анықталады.
