Қосшы қаласында электр желілерін жаңғырту және кеңейту жұмыстары жоспарлы түрде жүзеге асырылып келеді. Аталған жоба қаланың оңтүстік бөлігі мен 19–20-шағынаудандарды тұрақты электр қуатымен қамтамасыз етуге бағытталған. Бұл аумақтарда шамамен 3 мың абонент тұрады.
2023 жылы облыстық бюджет есебінен жобалық-сметалық құжаттама әзірленіп, оған 2,9 млрд теңге бөлінді. Сол құжаттама негізінде 2025 жылы құрылыс-монтаж жұмыстары басталып, бас мердігер ретінде «Инсект» ЖШС анықталды. Жұмыстың сапасын бақылау мақсатында техникалық және авторлық қадағалау міндеті «Redline Pro» және «Мерей-Тайынша» серіктестіктеріне жүктелген.
Қазіргі таңда құрылыс жұмыстары бекітілген кестеге сәйкес атқарылуда. Қала аумағында жаңа тіректер орнатылып, темірбетон элементтерін құру, бұрғылау және кабель тарту жұмыстары жүргізіліп жатыр. Сонымен қатар трансформаторлық қосалқы стансаларға арналған іргетастар дайындалуда.
Жалпы жұмыстың 27 пайызы орындалды. Бүгінге дейін 753 дана СВ 95-2 және 202 дана СВ 105-5 электр тіректері қойылды. Сондай-ақ 5 шақырым СИП қуат кабелі тартылды. Жоба толық аяқталған соң Қосшы қаласындағы электрмен жабдықтау сапасы айтарлықтай жақсарып, жүйенің қуаттылығы артады.
Жобаның тапсырыс берушісі – Қосшы қаласының құрылыс бөлімі. Құрылыс жұмыстары 2025 жылдың шілдесінде басталған, ал нысанды желтоқсан айында аяқтау жоспарланып отыр.
Аталған бастама Қосшы қаласының инфрақұрылымдық дамуына серпін беріп, жаңа шағынаудандардың тұрақты әрі қауіпсіз электр энергиясымен қамтылуына мүмкіндік жасайды.
