Қосшы қаласында кәсіпкерлік саласы жыл сайын қарқынды дамып, тұрақты өсім көрсетіп келеді.
2021 жылы қалада 1 549 шағын және орта бизнес субъектісі тіркеліп, олардың 1 396-сы белсенді қызмет атқарса, 2022 жылы бұл көрсеткіш айтарлықтай өсіп, тіркелген кәсіпкерлер саны 2 386-ға жетіп, оның 2 237-сі нақты жұмыс істеді. 2023 жылы кәсіпкерлік әлеует одан әрі кеңейіп, қалада 2 840 кәсіпкерлік субъектісі тіркелді, барлығы дерлік белсенді жұмысқа кірісті. 2024 жылы Қосшының бизнес саласы жаңа деңгейге көтеріліп, 3 857 кәсіпкерлік нысан тіркелсе, олардың 3 632-сі тұрақты қызметін жалғастырды. Ал 2025 жылдың қаңтар–қазан айлары аралығында тіркелген кәсіпкерлер саны 4 551-ге жетіп, оның 4 306-сы белсенді жұмыс істеп, қаланың экономикалық дамуына елеулі үлес қосып жатыр.
Инвестициялық ахуал да жыл сайын тұрақты өсіп келеді. 2021 жылы негізгі капиталға 20,8 млрд теңге инвестиция тартылса, 2022 жылы бұл көрсеткіш 31,7 млрд теңгеге дейін көбейіп, алдыңғы жылмен салыстырғанда 152 пайыздық өсім көрсетті. 2023 жылы инвестициялар көлемі 45,6 млрд теңгеге жетіп, 2024 жылы 46,4 млрд теңгені құрады. 2025 жылдың қаңтар–қазан айлары ішінде негізгі капиталға 40 млрд теңге инвестиция салынып, өткен жылдың сәйкес кезеңімен салыстырғанда 107,6 пайыздық өсім байқалды. Ал жыл соңына дейін инвестиция көлемінің 65 млрд теңгеге жетуі күтілуде, бұл Қосшының экономикалық әлеуетінің тұрақты артып келе жатқанын айқын көрсетеді.
Қаланың әлеуметтік-экономикалық өміріндегі маңызды бағыттардың бірі — тұрақты ауылшаруашылығы жәрмеңкелерін ұйымдастыру. 2022 жылы 18 жәрмеңке өткізіліп, 77 млн теңгенің өнімі сатылды. 2023 жылы жәрмеңкелер саны 26-ға жетіп, 135,4 млн теңгенің ауылшаруашылық өнімі тұрғындарға ұсынылды. 2024 жылы 20 жәрмеңке ұйымдастырылып, 10,5 млн теңгенің өнімі сатылды. Ал 2025 жылдың қаңтар–қазан айлары аралығында 6 жәрмеңке өткізіліп, жалпы 12 млн теңгеге жуық өнім тұрғындарға ұсынылды, бұл жергілікті кәсіпкерлердің қолдау табуы мен қалалық экономиканың жандануын айқын көрсетеді.
Қосшы қаласындағы кәсіпкерлік пен инвестициялық белсенділік қала экономикасының тұрақты дамуы мен тұрғындардың әл-ауқатының артуына нақты әсер етуде.
