Республика күніне орай Қосшы қаласында тұрғын үй алу кезегінде тұрған азаматтарға жаңа пәтер кілттерін салтанатты түрде табыстау рәсімі өтті.
Іс-шараға Ақмола облысы әкімінің орынбасары Алтынай Әміренова қатысып, қоныс иелерін көптен күткен қуаныштарымен құттықтады.
«Президенттің тапсырмасына сәйкес, азаматтарды, әсіресе әлеуметтік жағынан осал топтарды тұрғын үймен қамтамасыз ету – мемлекеттік саясаттың басым бағыттарының бірі болып қала береді», – деп атап өтті әкімнің орынбасары.
Іс-шара елімізде алғаш рет жүзеге асырылып отырған «Отбасы банкінің» пилоттық тұрғын үй бөлу жобасы аясында өтті. Бұл жоба мұқтаж азаматтарды тұрғын үймен қамтамасыз етудің жаңа әрі тиімді тетігін ұсынады.
Жаңа пәтер иелері мемлекет тарапынан көрсетіліп отырған қолдау үшін ризашылықтарын білдіріп, қуаныштарымен бөлісті.
Айта кетейік, биыл облыс бойынша әртүрлі санаттағы азаматтарға, соның ішінде әлеуметтік осал топтарға жататын кезектегілерге шамамен 700 пәтер берілді. Жалпы жыл соңына дейін 1200 пәтер беру жоспарланған, оның 500-і Қосшы қаласында табысталмақ.
