Қосшы қаласында қала әкімі Азамат Қапышевтың қатысуымен «Қыс-2025» командалық-штабтық оқу-жаттығуы өтті. Іс-шараның негізгі мақсаты – қыс мезгіліндегі төтенше жағдайлардың алдын алу және олардың салдарын жою бағытындағы дайындық деңгейін тексеру.
Оқу-жаттығу барысында азаматтық қорғау қызметтері мен шұғыл әрекет ету жасақтарының өзара іс-қимыл тәртібі пысықталды. Қала аумағында өткен оқу-жаттығуға 32 арнайы техника мен 45 маман жұмылдырылды.
Сонымен қатар, Қосшы қаласының орталық қазандығында тактикалық-арнайы жаттығу өткізілді. Бұл іс-шара барысында апатты жағдайлар туындаған сәтте жылу беру нысандарының жұмысын үздіксіз қамтамасыз ету, қауіпсіздік шараларын сақтау және жедел әрекет ету мәселелеріне баса назар аударылды.
Азаматтық қорғау жүйесінің негізгі мақсаты – төтенше жағдайлар кезінде халықтың қауіпсіздігін қамтамасыз ету. Осы бағытта өткізілген оқу-жаттығу азаматтық қорғау қызметтерінің өзара үйлесімділігін арттыруға және қысқы кезеңдегі ықтимал тәуекелдерді төмендетуге мүмкіндік береді.
Мамандардың айтуынша, мұндай оқу-жаттығулар тұрақты түрде өткізіліп тұрады және олардың нәтижесі – төтенше жағдайлар кезінде уақытылы әрі нақты шешім қабылдауға дайындық деңгейінің көрсеткіші.
Қосшы қаласында өткен «Қыс-2025» оқу-жаттығуы азаматтық қорғау жүйесінің тиімділігін арттыру мен тұрғындардың қауіпсіздігін қамтамасыз етуде маңызды рөл атқарды.
