Канадалық TELUS Agriculture & Consumer Goods компаниясының өкілдері өңірдің агроөнеркәсіптік әлеуетімен танысып, Ақмола облысы әкімінің орынбасары Мұрат Балпанмен бірге Зеренді ауданындағы ет бағытындағы жетекші кәсіпорындардың бірі – «KazBeef» ЖШС-не барды.
Канадалық аграршылар кәсіпорын басшылығымен кездесіп, мал шаруашылығы мен ауыл шаруашылығы өнімдерін өңдеу саласындағы ынтымақтастық мәселелерін, сондай-ақ аграрлық секторға заманауи технологияларды енгізу перспективаларын талқылады.
Кәсіпорын ет бағытындағы ірі қара малды бордақылау, өсімдік шаруашылығы және жем-шөп өндірумен айналысады. Ірі қара мал саны 13 мың басты құрайды. Оның құрамына ангус, герефорд және қазақтың ақбас сиыры тұқымдары кіреді. Ерекше назар ірі қара малды дәнді жеммен бордақылау технологиясына аударылды. Бұл технология еттің мәрмәрлігін қалыптастырып, оның дәмдік қасиеттерін жақсартуға мүмкіндік береді, нәтижесінде жоғары сапалы премиум санаттағы сиыр еті өндіріледі. Қонақтар бордақылау алаңын, ветеринарлық бөлімді және компания егістіктерін аралап көрді.
Канадалық компанияның басшысы Крис Терри Канада мен Қазақстандағы ауыл шаруашылығын дамыту тәсілдерінің айырмашылықтарына тоқталды.
«Канадада мал шаруашылығы мен ауыл шаруашылығын дамытуда ғылыми негізделген, технологиялық тұрғыдан жетілдірілген тәсілдерге көбірек сүйенеді. Ал Қазақстанда дәстүрлі шаруашылық жүргізу әдістері мен инновациялар ұштасып жатыр. Бұл саланы дамытудың бірегей моделін қалыптастырады. Біз мұнда айтарлықтай инвестициялық әлеует пен ұзақ мерзімді ынтымақтастық мүмкіндіктерін көріп отырмыз», – деді ол.
Сондай-ақ делегация Ақкөл ауданындағы «Еңбек» ЖШС-не барды.
Кездесу қорытындысы бойынша тараптар одан әрі ынтымақтастық перспективалары мен канадалық компания мен Ақмола облысының агроөнеркәсіптік секторы арасындағы іскерлік байланыстарды кеңейту мүмкіндіктері жөнінде пікір алмасты.
Айта кетейік, өңірде 86 ет бағытындағы ферма, 47 мамандандырылған сүт-тауар фермасы және бір мезетте 33,5 мың басты бордақылауға арналған жалпы қуаты бар 7 ірі бордақылау алаңы жұмыс істейді. Жалпы облыста шамамен 470 мың бас ірі қара мал бар.
