Көкшетаудағы «Достар» мәдениет үйінде мектеп оқушылары мен студенттерге арналған ірі профориентациялық кездесу өтті. Ақмола облысы полиция департаменті ұйымдастырған шараға шамамен 400 жас қатысушы құқық қорғау органдарының жұмысы және қызметке түсу мүмкіндіктері туралы толық ақпарат алды.
Департамент бастығының орынбасары, полиция полковнигі Аслан Қызбикенов жастарға қызметтің маңызды әрі жауапты мамандық екенін атап өтіп, жоғары дайындық, тәртіп пен азаматтарды қорғауға дайын болудың қажеттілігін жеткізді.
Кездесу барысында Шоқан Уәлиханов атындағы университет пен Абай Мырзахметов атындағы Көкшетау университетінің өкілдеріне департамент атынан алғыс хаттар табыс етілді.
Қатысушылар үшін арнайы стендтер, презентациялар мен видеороликтер ұсынылып, түрлі бөлімшелердің қызметі таныстырылды. Оқушыларға қызметтік қару үлгілері, арнайы киім мен қорғаныс құралдары көрсетіліп, патрульдік көліктер мен арнайы техникамен танысу мүмкіндігі берілді.
Кездесу барысында кинологтар мен қызметтік иттер көрсетілді, сондай-ақ арнайы құрам мен криминалистер өз тәжірибелерімен бөлісті. Жастарға спорт шеберлері де таныстырылып, республикалық және халықаралық жарыстардағы жетістіктері айтылды.
Оқушылар мен студенттер құқық қорғау қызметіне арналған викторинаға қатысты. Жеңімпаздар есте қаларлық сыйлықтар мен профилактикалық логотиптері бар футболкаларға ие болды. Сондай-ақ, департамент қызметкерлері абитуриенттерге қойылатын талаптар, оқу орындарына түсу тәртібі, киберқылмыстар, алаяқтық схемалары және есірткі заттарын қолдану мен таратуға байланысты жауапкершілік туралы ақпарат берді.
Кездесу «Жас сақшы» полицейлік класының оқушылары мен Көкшетау техникалық лицейінің студенттерінің патриоттық композициясымен қорытындыланды. Барлық қатысушыларға ҚР ІІМ академиялары туралы ақпараттық брошюралар табыс етілді. Іс-шара ұйымдастырушылары болашақта осы жас ұрпақтың бір бөлігі құқық қорғау органдарында қызмет ететін болады деген үміт білдірді.
