Президенттің тапсырмасы бойынша Көкшетау қаласында әлеуметтік инфрақұрылымды дамыту аясында көпфункционалды спорт және мәдениет кешені салынуда. Бұл жоба – өңір халқының салауатты өмір салтын ұстануына, спортпен жүйелі түрде айналысуына және мәдени өмірін байытуға бағытталған маңызды бастама.
Посмотреть эту публикацию в Instagram
Нысанның құрылысына қайтарылған активтер есебінен құрылған арнайы мемлекеттік қордан 12,6 млрд теңге бөлінген.
Жаңа спорт кешенінде бокс, күрес, ауыр атлетика және кроссфит залдары болады. Барлық спорт залдары олимпиадалық стандарттарға сай сертификатталған жабдықтармен қамтылады. Бұл өз кезегінде Көкшетауда республикалық және халықаралық деңгейдегі жарыстарды, соның ішінде IBA стандартындағы турнирлерді өткізуге мүмкіндік береді.
Кешен аумағында екі футбол алаңы, ядро мен найза лақтыруға арналған алаң, жаттығу және ойын аймақтары, әмбебап спорт алаңдары мен жеңіл атлетикалық сектор салынады. Сондай-ақ, мүмкіндігі шектеулі азаматтарға арналған инфрақұрылымдық жағдайлар толықтай қарастырылған.
Бұдан бөлек, кешенде өрмелеу қабырғасы бар әмбебап спорт залы және өрт-қолданбалы спорт түрлеріне арналған арнайы мұнара орнатылады. Мұнда Төтенше жағдайлар министрлігіне қарасты Азаматтық қорғау академиясының курсанттары кәсіби дайындықтарын шыңдай алады.
Сонымен қатар, нысан құрамында 650 орындық заманауи мәдени-бұқаралық іс-шараларға арналған мультимедиялық зал ашылады.
Қазіргі уақытта құрылыстың негізгі кезеңдері аяқталған. Нысанда ішкі әрлеу, инженерлік желілерді тарту және абаттандыру жұмыстары жүріп жатыр. Жалпы дайындық деңгейі 85 пайызды құрайды. Нысан жыл соңына дейін пайдалануға берілмек.
Бұл жобаның жүзеге асуы аймақ тұрғындары үшін спорт нысандарына қолжетімділікті арттырып, салауатты өмір салтын насихаттауға және жастарды спортқа баулуға зор мүмкіндік береді.
