Қосшы қаласы жыл өткен сайын көркейіп, заманауи инфрақұрылыммен толығып келеді. Соның айқын дәлелі – тұрғындардың сүйікті орнынa айналған «ALAN» дене шынықтыру-сауықтыру кешені.
Бұл жаңа спорт орталығы заманауи талаптарға сай жабдықталып, спортшылар мен қала тұрғындарына қолайлы жағдай жасалған. Мұнда жүзу бассейні, жаттығу залы, ойын алаңдары мен түрлі спорт секциялары жұмыс істейді.
Бүгінде «ALAN» кешенінде 600-ге жуық бала мен жасөспірім спорттың әр түрімен тұрақты түрде шұғылданады. Олар жүзу, еркін күрес, футбол, баскетбол, волейбол, дзюдо, бокс, каратэ, көркем гимнастика және аралас жекпе-жек (ММА) секцияларына қатысады. Жас спортшылардың арасынан қалалық, облыстық және республикалық жарыстардың жеңімпаздары мен жүлдегерлері де шыққан.
Кешен тек балаларға ғана емес, ересектерге де ашық. Қала тұрғындары бассейн мен жаттығу залында тұрақты түрде спортпен айналыса алады. Әсіресе көп балалы отбасылардың балалары, мүмкіндігі шектеулі жандар және зейнеткерлер үшін жеңілдік қарастырылған.
Кешен ашылған уақыттан бері 50-ге жуық спорттық іс-шара ұйымдастырылып, жүздеген тұрғынның салауатты өмір салтын ұстануына жол ашылды.
Қосшы қаласы мен Тайтөбе ауылы тұрғындарының басын қосқан «ALAN» бүгінде тек спорт орталығы ғана емес, қоғамдағы белсенді өмір мен денсаулықтың символына айналып отыр.
Салауатты ұлт – мықты елдің кепілі. Ал осындай спорттық нысандар – сол мақсатқа бастар нақты қадам.
