Көкшетау қаласында жылыту маусымы басталғалы қатты отынмен қамтамасыз ету мәселесі жергілікті атқарушы органдардың тұрақты бақылауында тұр.
Қала әкімдігінің мәліметінше, көмір тасымалы кестеге сай жүргізілуде. Қазіргі уақытта өңірге жеткізілген көмір қоры тұрғындар мен әлеуметтік нысандардың қажеттілігін өтеуге жеткілікті.
Осыған орай қала әкімі Әнуар Күмпекеев журналистермен бірге Көкшетаудағы ірі көмір сақтау базаларының біріне барып, көмірдің жеткізілу барысымен және бағалық жағдайымен танысты.
Мердігер ұйым өкілдерінің айтуынша, көмір тасымалы үздіксіз жалғасуда. Бір тонна көмірдің орташа бағасы бүгінде 20 мың теңге шамасында. Алдағы уақытта баға төмендеуі мүмкін екені айтылды, бірақ бұл жөнінде нақты түсіндірме берілмеген.
Көмірдің сапасына қатысты да кейбір ескертпелер бар. Кей жеткізілімдерде көмірдің ұсақтығы байқалғанымен, келесі партияларда сапалы қатты отын жеткізу көзделіп отыр.
Жылыту маусымы басталғаннан бері қаланың барлық жылу нысандары штаттық режимде жұмыс істеуде. Жаз айларында жоспарлы жөндеу жұмыстары аяқталып, жылу жүйелері толық дайындықтан өткен.
Қала әкімінің айтуынша, алдағы уақытта Көкшетаудың жылу жүйесін жаңғырту және қуатты арттыру бағытында бірқатар жобалар жүзеге аспақ. Оның ішінде Красный Яр қазандығының қуатын тиімді пайдалану, сондай-ақ жылу электр орталығына қосылу мәселесі де күн тәртібінде тұр.
«Халықтың тұрмыс сапасы мен жылу мәселесі – біздің басты назарымызда. Сондықтан көмірмен қамту мен жылу жүйесінің үздіксіз жұмыс істеуі тұрақты бақылауда болады», – деді Әнуар Күмпекеев.
Қазіргі таңда Көкшетау жылыту маусымын тұрақты өткізіп, тұрғындардың жылусыз қалмауын қамтамасыз етіп отыр.
