Бүгін Қосшы қаласының қоғамдық мәдени-спорт кешенінде қала прокуратурасының үйлестіруімен «Халық заңгері» республикалық акциясы өтті.
Аталған шараның басты мақсаты – азаматтарға тегін құқықтық көмек көрсету, олардың құқықтары мен міндеттерін түсіндіруге жәрдемдесу, сондай-ақ қоғамда құқықтық мәдениетті қалыптастыруға үлес қосу.
Акция барысында білікті заңгерлер мен құқық қорғау органдарының өкілдері, жергілікті атқарушы және өзге де мемлекеттік органдардың қызметкерлері қала тұрғындарын қабылдап, өзекті құқықтық мәселелер бойынша кеңес берді.
Азаматтар азаматтық, еңбек, тұрғын үй, әлеуметтік және өзге де салаларға қатысты сұрақтарына жан-жақты жауап алды. Көптеген өтініштер нақты мысалдар негізінде қаралып, тиісті түсіндірме жұмыстары жүргізілді.
Сонымен қатар, тұрғындарға құқықтық көмек алу тетіктері мен мемлекеттік қызметтерді электрондық форматта пайдалану жолдары таныстырылды. Бұл, өз кезегінде, азаматтардың заңды құқықтарын тиімді іске асыруына мүмкіндік береді.
Прокуратура өкілдерінің айтуынша, «Халық заңгері» акциясы еліміз бойынша тұрақты түрде өткізіліп келеді және оның басты нәтижесі – халықтың құқықтық сауаттылығын арттыру, азаматтардың мемлекетке және заңға деген сенімін күшейту.
Құқықтық мәдениеті жоғары қоғам – әділдіктің, тұрақтылық пен сенімнің кепілі.
Заңды білу – сенімді өмірдің кепілі. Әр азамат өз құқығын қорғап, заң аясында әрекет етуге міндетті және соған лайықты құқықтық қолдау таба алады.
