Ақмола облысында полицейлер құрамында алтын бар материалды заңсыз өңдеумен айналысқан жасырын өндіріс орнын анықтап, оның қызметін тоқтатты. Жедел-іздестіру шаралары барысында ұйымдасқан қылмысқа қарсы күрес басқармасының қызметкерлері облыс аумағындағы Заводской кентінен заң талаптарына сай келмейтін арнайы жабдықтарды тапқан.
Тексеру барысында жерасты цехының иесі ретінде Ақсу кентінің 38 жастағы тұрғыны анықталды. Жедел деректерге сәйкес, ол алтын құрамды шикізатты өңдеу процесін өз бетінше жолға қойған. Аталған қызмет тиісті рұқсат құжаттарынсыз жүзеге асырылған.
Тергеу әрекеттері кезінде құқық қорғау органдары заңсыз өндірісте пайдаланылған арнайы жабдықтарды, сондай-ақ қылмыстық әрекетті дәлелдейтін өзге де заттай айғақтарды тәркіледі.
Аталған дерек бойынша Қазақстан Республикасы Қылмыстық кодексінің 295-1-бабының 1-бөлігі (бағалы металдардың заңсыз айналымы) бойынша қылмыстық іс қозғалды. Қазіргі уақытта сотқа дейінгі тергеп-тексеру жүргізілуде. Сонымен қатар заңсыз өнімді өткізуі мүмкін арналар мен өзге де мән-жайлар анықталуда.
Полиция өкілдері аталған баптың санкциясы 200 айлық есептік көрсеткішке дейінгі мөлшерде айыппұл салуды, қоғамдық жұмыстарға тартуды немесе 50 тәулікке дейінгі мерзімге қамауға алуды көздейтінін еске салады.
