Ақмола облысында мал шаруашылығы саласына қатысты ірі көлемдегі қылмыстық іс бойынша тергеу амалдары жүргізіліп жатыр. Облыстық полиция департаментінің мәліметінше, Целиноград аудандық полиция бөлімінің тергеушілері шамамен 50 миллион теңге көлемінде залал келтірілген малды иемдену және ысырап ету фактісі бойынша қылмыстық істі тергеп жатыр.
Құқық қорғау органдарына аталған дерек бойынша арыз қаңтар айының басында түскен. Софиевка ауылында орналасқан серіктестіктің құрылтайшысы кәсіпорын қызметкерлерінің бірі сеніп тапсырылған малды заңсыз сатып, кәсіпорынға аса ірі көлемде материалдық шығын келтіргенін хабарлаған.
Алдын ала мәліметтерге сәйкес, 2025 жыл бойы 30 жастағы фермер серіктестікке тиесілі 48 бас ірі қара малды, 460 бас ұсақ малды және 8 жылқыны жергілікті тұрғындарға сатып отырған. Қылмыстық әрекетін жасыру мақсатында ол ауыл тұрғындарының малын пайдаланып, олардың малдарына серіктестікке тиесілі малға тағылатын сары түсті сәйкестендіру сырғаларын бекіткен. Соның салдарынан жоспарлы тексерулер кезінде мал басындағы айырмашылық анықталмаған.
Аталған факт бойынша қылмыстық іс тіркеліп, сотқа дейінгі тергеп-тексеру басталды. Қазіргі таңда күдікті Ақмола облысының аумағынан тыс жерге кеткен. Оны анықтау және ұстау бағытында жедел-іздестіру және тергеу шаралары жалғасуда.
Құзырлы органдар тергеу нәтижесі бойынша заң аясында тиісті процессуалдық шешім қабылданатынын хабарлады. Қылмыстық іс бойынша тергеу жалғасуда.
