Қосшы қаласында №35 мамандандырылған өрт сөндіру бөлімі жұмыс істейді. Бөлімнің негізгі міндеті – төтенше жағдайлардың алдын алу және оларды жою, өрттерді сөндіру, сондай-ақ қауіпті жағдайда қалған адамдарды құтқару. Бұл бөлімше өңірдің қауіпсіздігін қамтамасыз етуде маңызды орын алады.
Бөлімнің жеке құрамы толық жасақталған. Қызметкерлердің қолдануында заманауи өртке қарсы-техникалық жабдықтар, апаттық-құтқару құралдары, сондай-ақ негізгі, арнайы және көмекші техниканың барлық түрлері бар. Бұл өрт сөндірушілерге кез келген жағдайға жедел әрі тиімді әрекет етуге мүмкіндік береді.
Құтқарушы мамандығы жоғары кәсіби дайындықты, төзімділікті және елеулі физикалық күшті талап етеді. Биылғы жылдың өзінде Қосшы қаласының құтқарушылары 150-ден астам шұғыл шақыртуға шыққан. Әрбір шақырту – кәсіби жауапкершіліктің, шұғыл шешім қабылдаудың және қауіпке қарамастан қызмет көрсетуге дайындықтың көрінісі.
Мамыр айында қала аумағындағы бір нысанда газ сақтауға арналған резервуар тұтанған кезде туындаған өрт биылғы ең күрделі жағдайлардың бірі болды. Жоғары тәуекелді талап еткен бұл оқиғада өрт сөндірушілер 20 сағаттан астам уақыт бойы тоқтаусыз жұмыс істеп, тілсіз жаудың одан әрі таралуына жол бермеді.
Аталған өрт кезінде ерекше ерлік көрсеткен бөлімше командирі Ерқанат Шахманов өз қызметтік борышын атқару үстінде жоғары жауапкершілік пен қайсарлық танытты. Оның ерлігі еленіп, Қазақстан Республикасы Президентінің Жарлығымен «Айбын» орденінің ІІІ дәрежесімен марапатталды.
Қосшы қаласының өрт сөндіру қызметі – азаматтардың қауіпсіздігі жолында тәулігіне 24 сағат, аптасына 7 күн тоқтаусыз қызмет ететін, қоғам үшін маңызды құрылым.
Өртке қарсы қызмет бөлімшелерінің жұмысы – қоғам қауіпсіздігінің басты кепілі. Қызметкерлердің кәсібилігі, тәртібі және кез келген сәтте көмек көрсетуге дайындығы өңірдің тұрақтылығы мен тұрғындардың амандығын қамтамасыз етуде айрықша маңызға ие.
