Қосшы қаласы Мәдениет үйі жанындағы «Кәусар» ұлттық би үйірмесінің жас таланттары халықаралық деңгейде ел мерейін үстем етті. Шығармашылық ұжым өнер бәйгесінде үздік нәтиже көрсетіп, Гран-при жүлдесін қанжығасына байлады. Бұл — ұжымның жүйелі еңбегі мен кәсіби дайындығының нәтижесі, сондай-ақ ұлттық би мектебінің әлеуетін айқын көрсеткен жеңіс.
Өнерпаздардың сахна мәдениеті, орындаушылық шеберлігі мен ұлттық нақышты жаңаша жеткізе білуі қазылар алқасының жоғары бағасына ие болды. Жас бишілердің әр қимылы мен композициялық тұтастығы көрерменнің де ыстық ықыласына бөленді.
Ұжымның жетекшісі Қалыбаева Әсел Бақытқызының еңбегі ерекше атап өтуге тұрарлық. Ол шәкірттерін би мәдениетінің терең мәнін ұғындырып, ұлттық өнерге деген сүйіспеншілігін кәсіби машықпен ұштастырып келеді. Ұстаздың ұқыпты дайындығы, талапшылдығы мен шығармашылық ізденісі жас дарындардың биік жетістікке жетуіне жол ашты.
«Кәусар» үйірмесінің жеңісі — Қосшы қаласы өнерінің ғана емес, қазақ биінің халықаралық деңгейде танылуының көрсеткіші. Бұл жетістік жас буынның ұлттық мәдениетке деген қызығушылығын арттырып, жаңа мақсаттарға жетелей түсетіні сөзсіз.
Өнер ұжымын тарихи жеңісімен құттықтаймыз! Алдағы уақытта да шығармашылық шабыттары артып, биік белестерді бағындыра берулеріне тілектестік білдіреміз.
