Қосшы қаласының әкімі Азамат Қапышев жаңадан ашылған «Слово и Дело KZ» ЖШС-нің «SD» өндірістік кешенінің жұмысымен танысты. Зауытқа жасаған сапар барысында кәсіпорын басшысы Александр Скориков өндіріс процесін толық таныстырып, шығарылатын өнімдердің ерекшеліктері жөнінде мәлімет берді.
Қосшыда ашылған бұл жаңа өндірістік кешен автоматты жылжымалы есіктер мен автоматты айналмалы есіктерге арналған жабдықтарды, сондай-ақ алюминий профильдерін өңдеуге қажетті құрал-жабдықтарды өндіреді. Айта кетерлігі, дәл осындай бағытта жабдық шығаратын еліміздегі жалғыз кәсіпорын осы кешен болып отыр.
Кешен 2025 жылдан бастап толық қуатымен жұмыс істей бастады. Өндірістік алаң 1,364 гектар аумақты алып жатыр. Бүгінгі таңда мұнда орташа жалақысы 350 мың теңгені құрайтын 7 қызметкер жұмыс істейді. Қазіргі таңда өндіріс орны заманауи технологияларды қолдана отырып, отандық нарықтағы сұранысты өтеуге әрі импорттық тәуелділікті азайтуға үлес қосуда.
Жергілікті өндірістің дамуына серпін беріп отырған бұл жоба Қосшы қаласының өнеркәсіптік әлеуетін арттыруға бағытталған маңызды қадамдардың бірі саналады. Шағын және орта бизнестің қолдауымен жүзеге асқан бастама өңірде жаңа жұмыс орындарының ашылуына, өндірістік инфрақұрылымның кеңеюіне ықпал етуде.
Қосшы қаласының әкімдігі алдағы уақытта да осындай өнеркәсіптік жобаларды қолдап, қаланың экономикалық мүмкіндігін кеңейтуге басымдық бермек.
