Қосшы қаласында алғаш рет көркем гимнастикадан жарыс ұйымдастырылды. Жарысқа Астана қаласының «Огни», «Атогис», «Сапфир», «Лидер» гимнастика мектептерінің спортшылары мен Қосшы қаласының өкілдері қатысты. 3–12 жас аралығындағы сексенге жуық қыз бала қатысқан бұл жарыс жас спортшыларға тәжірибе жинауға мүмкіндік берді.
Қосшы қаласының әкімі орынбасары Берген Жұмкей қатысушыларға сәттілік тілеп, жарысты ашты. Спортшылардың дайындықтары мен өнер көрсету сапасы елімізде көркем гимнастикадан жақсы нәтижелерге қол жеткізген кәсіби спортшылар тарапынан жоғары бағаланды.
Бас төреші – Мұхамеджанова Әйгерім Дулатқызы, хатшы – Темірбаева Гүлбахрам Ренатқызы, төрешілер – Кинаш Камила Бақытжанқызы, Жұмабек Ақмарал Айдарқызы, Омарова Дана Ернарқызы, Сұлтанова Регина Модарисқызы, Олжабаева Дариға Еркінқызы және Бахтияр Аяулым Абдхамидқызы жарыстың әділ өтуіне үлес қосты.
Жарыс қорытындысында үздік нәтиже көрсеткен гимнасшылар марапатталып, жүлделер табыс етілді. Ұйымдастырушылар бұл шараның өңірде көркем гимнастиканың дамуына зор ықпал ететінін атап өтті.
Еске сала кетейік, көркем гимнастика – дене сұлулығын қалыптастырып, эстетикалық тәрбие беретін спорт түрі. Әлемдік чемпионаттар 1963 жылдан бері, ал Олимпиада ойындарының бағдарламасында 1984 жылдан бері өткізіліп келеді. Қазақстанда бұл спорт түрі 1947 жылы Алматыдағы дене тәрбиесі интернатында дамыған, ал 1949 жылы гимнасшы қыздар арасында тұңғыш республикалық жарыс өткізілген.
