Ақмола облысында Мемлекет басшысының тапсырмасына сәйкес, Астана агломерациясын кешенді дамыту аясында Тайтөбе ауылын газдандыру бойынша ауқымды жоба жүзеге асырылып жатыр. Бұл туралы Ақмола өңірлік коммуникациялар қызметі хабарлады.
Посмотреть эту публикацию в Instagram
2022 жылы әзірленіп, мемлекеттік сараптамадан өткен жоба құны 1,8 миллиард теңгені құрайды. Газбен қамту көзі ретінде Қосшы қаласы белгіленген.
Биылғы қыркүйек айында конкурс нәтижесінде мердігер ұйым болып «Шымкентгаз» жауапкершілігі шектеулі серіктестігі анықталып, келісімшарт жасалған. Құрылыс-монтаж жұмыстары 2025 жылдың шілде айында басталған.
Қазіргі таңда ауыл ішінде 15,4 шақырым төмен қысымды және 2,8 шақырым орта қысымды газ желісі тартылды. Жалпы ұзындығы 75 шақырымды құрайтын газ құбыры толықтай жер астымен жүргізіледі, бұл жүйенің ұзақ мерзімділігі мен қауіпсіздігін қамтамасыз етеді.
Қосшы қаласының әкімі Азамат Қапышевтың айтуынша, газдандыру ісі Үкімет пен облыс басшылығының тұрақты бақылауында.
– Мемлекет басшысының тапсырмасына сәйкес, Қосшы қаласы мен Тайтөбе ауылын газбен қамту жұмыстары кезең-кезеңімен іске асуда. Биылғы 16 қыркүйекте Президенттің қатысуымен жобаның алғашқы кезеңі іске қосылды. Соның нәтижесінде 79 көше бойынша шамамен 31 мың тұрғын табиғи газға қол жеткізді. Ал екінші және үшінші кезеңдер келесі жылдың соңына дейін аяқталады деп жоспарлануда, – деді әкім.
Ал «Шымкентгаз» ЖШС өкілі Жасұлан Өмірбеков өз кезегінде құрылыс жұмыстарының кестеге сай жүргізіліп жатқанын атап өтті.
– Газ желісі жоғары және төмен қысымды екі деңгейден тұрады. Барлық жұмыстар бекітілген мерзімге сәйкес орындалуда. Жыл соңына дейін 17 мың метрге жуық құбыр тарту көзделіп отыр, – деді ол.
Бейресми деректерге сүйенсек, Тайтөбе ауылында 7 мыңнан астам тұрғын бар. Жоба толық аяқталған соң елді мекен толықтай табиғи газбен қамтамасыз етіледі.
Бұл жұмыс – ел халқын қолайлы өмір сүру жағдайымен қамтамасыз етуге бағытталған Президент тапсырмасының нақты орындалуының көрінісі.
