Қазан айының екінші жексенбісі – мүмкіндігі шектеулі жандар күні болса, соңғы жексенбісі – әлеуметтік қорғау жүйесі қызметкерлерінің кәсіби мерекесі. Бұл күндер – ресми шара ғана емес, мейірім мен шапағаттың, ізгілік пен адамгершіліктің мерекесіне айналған атаулы дәстүр.
Бүгінгі таңда елде халықты әлеуметтік қорғау жүйесін жетілдіру бағытында жүйелі жұмыстар жүргізілуде. Әлеуметтік қызмет көрсету орталықтарының саны артып, мұқтаж жандарға түрлі бағыттағы көмектер көрсетілуде. Мұның барлығы мемлекет тарапынан әлеуметтік саясаттың нақты жүзеге асып отырғанын айғақтайды.
Кәсіби мереке күні Қосшы қаласының әкімінің орынбасары Берген Жұмкей әлеуметтік сала қызметкерлерін құттықтап, қоғамның әлсіз топтарына қамқорлық танытып жүрген мамандарға қала басшысының алғысын жеткізді. Ол әлеуметтік сала өкілдерінің еңбегін жоғары бағалап, олардың мейірім мен жан жылуын ұдайы бөлісіп келе жатқанын атап өтті.
Сондай-ақ, қала басшылығы мүмкіндігі шектеулі жандар арасында дәстүрлі түрде өтетін облыстық «Үміт» спартакиадасының жүлделі екінші орын иегерлері – қосшылық спортшыларға ыстық ықыласын білдіріп, жетістіктерімен мақтанатындарын айтты.
Әлеуметтік қорғау жүйесінің мамандары – қоғамның рухани тірегі. Олардың еңбегі елдегі әлеуметтік саясаттың тиімді жүзеге асуына, адам құқықтары мен қоғамдық тұрақтылықтың сақталуына зор үлес қосып отыр.
Мейірімділік пен қамқорлық – адамгершіліктің айнасы. Сол айнадай жарқыраған әлеуметтік сала қызметкерлерінің еңбегі құрметке де, алғысқа да лайық.
