500-ге жуық адамды біріктірген спорттық мереке 21 маусымда Көкшетаудың орталық алаңында өтті. Жаппай жарысқа полиция, құқық қорғау органдарының қызметкерлері, кәсіби спортшылар мен жеңіл атлетика әуесқойлары қатысты.
Полиция департаменті алғаш рет ұйымдастырған іс-шара қатысушыларды адам көпшілігімен және ойын-сауықпен таң қалдырды. Өңірдің тәртіп сақшылары өздерінің кәсіби мерекесі қарсаңында және «Динамо» дене шынықтыру-спорт қоғамының 100 жылдығына орай қала тұрғындары үшін осындай сыйлық жасады. Мұндай бастаманың басты алғышарты салауатты өмір салтын насихаттау және есірткі қолданудан бас тарту болып табылады.
Спортшылар мен көрермендерді концерттік бағдарлама, қызметтік автокөліктер көрмесі және спорттық мерекенің басты бөлігі – 6 шақырым қашықтыққа жүгіру күтіп тұрды.
Тәуелсіздік алаңының басты сахнасынан марафоншыларды Полиция департаментінің бастығы Нұрсұлтан Мукашев қарсы алды. Бірінші басшы қызметкерлер мен қала тұрғындарына белсенді қатысқаны үшін алғысын білдірді:»…Бүгін сіздер қашықтыққа тек құқық қорғау органдарының өкілдері ретінде ғана шығып қоймайсыздар: өз мысалыңызбен қала тұрғындарын спортпен шұғылдануға шабыттандырасыздар, жеңе алмайтын кедергілер жоқ екенін растайсыздар… Сіздердің әрқайсыларыңыз осы жолды абыроймен еңсеруге бар күш — жігеріңізді салатындығыңызға және төзімділік пен табандылықты көрсететіңіздеріне сенімдімін…»,- деді Нұрсұлтан Маратұлы.
Ұйымдастырушылар барлық қатысушылар үшін арнайы бірыңғай дене жылыту жаттығуларын өткізді, содан кейін Департамент бастығы жарыстың басталуына жеке өзі бастама берді.
Спортшылар қаланың орталық көшелері арқылы, жағалау бойымен және кері бағытта 6 шақырым қашықтықты жүріп өтуі керек еді. Мәре сызығында қатысушыларды қошеметпен қарсы алып, әрқайсысына естелік медаль табысталды.
Ерлер арасында жас спортшы Михаил Скрипкин жеңімпаз атанды. Жас жігіт 10 жылдан бері шаңғы жарысымен айналысады, жоғары спорттық атақтар мен марапаттарға ие. Әйелдер арасында бірінші болып Көкшетау қаласының жедел басқару орталығының инспекторы аға лейтенант Людмила Яновская мәреге жетті. Қыз қызметті жеңіл атлетикадан жаттығулармен сәтті қоса алып жүреді және марафонда керемет нәтиже көрсетті.
Жарыс аяқталғаннан кейін барлық қатысушыларды Достар мәдениет үйінің шығармашылық ұжымдары мен Департаменттің вокалдық тобы дайындаған концерттік бағдарлама күтіп тұрды. Мұнда өздерінің жауынгерлік шеберліктерін жедел қимылдайтын арнайы жасақтың жауынгерлері көрсетті.
Спорттық мереке жүлделер ұтысымен аяқталды.
Ұйымдастырушылардың айтуынша, жарыс Көкшетау қаласының тұрғындары үшін жарқын спорттық оқиға ғана емес, сонымен қатар өңір полициясының қоғам үшін бірлігі мен ашықтығының символы болды.
