Әрбір малдың саулығының, әрбір шаруашылықтың берекесінің және тұрғындарымыздың дастарханына жететін сапалы өнімнің артында ветеринария мамандарының күнделікті қажырлы еңбегі тұр.
Бүгінде Целиноград ауданының ветеринариялық қызметі білімді, білікті және мақсатшыл жас мамандардың арқасында қарқынды дамып келеді. Жоғары оқу орындарын тәмамдаған түлектер «Дипломмен – ауылға!» бағдарламасы аясында ауылдық елді мекендерге келіп, туған жердің дамуына өз үлестерін қосуда.
Ветеринар мамандығы – жай ғана кәсіп емес. Бұл – жануарлардың денсаулығына, өнім қауіпсіздігіне және ауыл тұрғындарының әл-ауқатына деген үлкен жауапкершілік. Қыстың қақаған аязы мен жаздың аптап ыстығына қарамастан, ветеринарлар әрдайым ауыл тұрғындарының жанынан табылып, эпизоотиялық тұрақтылықты қамтамасыз ету жолында аянбай еңбек етеді.
Қазіргі таңда аудандық ветеринариялық станцияда еңбек етіп жүрген жас мамандар саланың дамуына елеулі үлес қосып келеді. Мемлекеттік қолдау шараларының арқасында 4 қызметкер тұрғын үй сатып алу үшін бюджеттік несие алса, 7 жас маман көтерме жәрдемақымен қамтамасыз етілді.
Сонымен қатар, 2025 жылдан бастап ветеринария қызметкерлеріне коммуналдық қызмет шығындарын өтеу түріндегі қосымша әлеуметтік қолдау көрсетілуде.
Бұл қолдау шаралары жас мамандардың ауылда тұрақтап, баспана алып, отбасын құрып, болашағына сеніммен қарауына мүмкіндік береді. Ал аудан үшін бұл – білікті кадрларды тарту мен ветеринариялық қызметтің әлеуетін нығайту деген сөз.
Жастардың ауылды таңдап, ел игілігі үшін еңбек етуі ерекше мақтаныш сезімін тудырады. Олардың білімі, жігері, бастамашылдығы мен мамандыққа деген сүйіспеншілігі ветеринария саласының дамуына, ауыл шаруашылығының өркендеуіне және азық-түлік қауіпсіздігінің нығаюына зор үлес қосуда.
Жас мамандарды қолдау – ауылдың жарқын болашағына салынған инвестиция. Бүгінгі қолдау – ертеңгі тұрақты даму мен ауданымыздың гүлденуінің кепілі!
