Жарқайың ауданында аудандық кітапхана базасында креативті индустрия кабинеті ашылып, өз жұмысын бастады. Аталған кеңістік шығармашылықты дамытуға, шабыт алуға және ұлттық дәстүрлерді дәріптеуге бағытталған.
Жаңа кабинетте ұлттық нақыштағы бұйымдарды тігумен айналысатын талантты шебер, Державинск қаласының тұрғыны Ермағанбетова Назгүл Қизатуллақызы еңбек етеді. Ол қазақ халқының бай мәдени мұрасын, салт-дәстүрі мен қолөнерінің ерекшелігін айшықтайтын бірегей туындылар жасап келеді.
Назгүл Қизатуллақызы 2019 жылдан бері қолөнермен айналысып, өз жұмыстарын аудандық мерекелік іс-шараларда ұсынып, көпшіліктің ықыласына бөленіп жүр. Қолөнер – оның сүйікті ісі әрі өмірлік таңдауы.
«Қолөнер — мен үшін жай ғана жұмыс емес, ол — жанымның тынысы. Әрбір жасаған бұйымым арқылы ұлттық нақышты дәріптеп, ата-бабамыздың өнерін кейінгі ұрпаққа жеткізгім келеді», — дейді шебер.
Кабинет аясында шебердің қолөнер туындыларынан көрме ұйымдастырылған. Кітапхана келушілері оның шығармашылығымен танысып, ұлттық ою-өрнектер мен нақыштардың ерекшелігін көре алады.
Аталған жоба ұлттық құндылықтарды насихаттауға, қолөнерді дамытуға және тұрғындардың шығармашылық әлеуетін арттыруға бағытталған.
Алдағы уақытта шебер өз кәсібін одан әрі дамытып, ауданның мәдени өміріне белсенді үлес қосуды жоспарлап отыр.
