Ақмола облысының әкімі Марат Ахметжанов Көкшетау қаласындағы «Белсенді ұзақ өмір» орталығында өңірдің ардагерлерімен және белсенді ұзақ өмір салтын ұстанып жүрген аға буын өкілдерімен кездесті.
Жылы жүздесуде өңір басшысына орталықтағы он алты үйірменің жұмысы таныстырылды. Қазіргі таңда орталыққа тіркелгендердің саны 1400-ден асып, күн сайын 400-ге жуық адам түрлі бағыттағы сабақтарға қатысып келеді.
Мұнда қариялардың белсенді өмір сүруіне барлық жағдай жасалған. Йога, би, фитнес, емдік дене шынықтыру, шахмат, тоғызқұмалақ, қолөнер, вокал, компьютерлік сауат ашу, қазақ және ағылшын тілдерін үйрету сабақтары тұрақты өтеді. Жақында орталықта каратэ, асық ату, театр үйірмесі және фольклорлық ансамбль де ашылып, қатысушылардың мәдени және рухани өмірін байыта түсті. Сонымен қатар, бассейн фитнесі мен атпен серуендеу үйірмелері де жұмысын бастады.
Бұл игі бастамалардың барлығы — өңір басшысының тікелей қолдауының нәтижесі. Кездесу барысында облыс басшысы орталыққа теннис үстелін сыйға тартып, сонымен қатар келушілердің қатынауын жеңілдету мақсатында шағын автобус әперуге сертификат табыс етті.
Қариялар мұндай қамқорлықты ерекше ризашылықпен қабылдады. Олардың айтуынша, облыс әкімінің жылы ықыласы мен нақты қолдауы – зейнет жасындағы азаматтардың қоғам өміріне белсенді араласуына зор серпін беріп отыр.
Жақында Мемлекет басшысының Жарлығымен «Парасат» орденімен марапатталған, «Көкше Энерго» серіктестігінің басшысы, меценат Досымхан Аралбаев та орталыққа ерекше тарту жасады – қазақтың киелі мұрасы киіз үйді сыйға тартты.
Бұл сый — материалдық көмек қана емес, ұлттық дәстүр мен рухани сабақтастықты дәріптеудің көрінісі. Енді киіз үйде ардагерлер бас қосып, ұлттық құндылықтар мен мәдениет жөнінде сыр шертісіп, елдік әңгімелер өрбітетін жаңа рухани орта қалыптаспақ.
Көкшетаудағы «Белсенді ұзақ өмір» орталығында орын алған бұл кездесу — аға буынға деген құрмет пен қамқорлықтың нақты үлгісі.
Ауа райының ызғары сезілсе де, әкім мен меценаттың жылы ықыласы мен шынайы ниеті қариялардың көңілін бір серпілтіп тастады.
Мұндай игі істер — қоғамның рухани берік іргетасы мен ұрпақтар сабақтастығын нығайтатын жарқын мысал.
