Ұлттық паркті қорғау туралы сөз болғанда, көпшілік рациясы мен қызметтік көлігі бар инспекторды елестетеді. Алайда аумағы 129 мың гектардан асатын табиғи аймақты қорғау заманауи материалдық-техникалық базасыз мүмкін емес. Қызметкерлердің өрт ошағына қаншалықты жылдам жететіні, заң бұзушыларды дер кезінде анықтай алатыны немесе қоқысты уақытылы шығара алатыны Бурабайдың бірегей экожүйесінің сақталуына тікелей әсер етеді.
Сондықтан «Бурабай» мемлекеттік ұлттық табиғи паркі материалдық-техникалық жарақтандыруды жүйелі түрде нығайтып, мемлекеттік инспекторларды күнделікті жұмысты тиімді атқаруға, төтенше жағдайлардың алдын алуға және кез келген оқиғаға жедел әрекет етуге қажетті техникамен қамтамасыз етіп келеді.
Бүгінде парк иелігінде 16 өрт сөндіру автокөлігі бар. Бұл техника орман өрттері туралы хабар түскен сәтте бірінші болып оқиға орнына аттанып, жеке құрамды, су қорын және өрт сөндіру жабдықтарын ең қолжетімсіз аумақтарға жеткізеді. Сонымен қатар орман өрттерімен күресте жеті шағын орман өрт сөндіру кешені пайдаланылады. Олар өртті бастапқы кезеңінде анықтап, жедел сөндіруге мүмкіндік береді.
Өрт қаупі жоғары маусым басталғалы бері Smart ерте анықтау жүйесі төрт өрт ошағын тіркеді. Барлық жағдайда өрттер бастапқы кезеңінде анықталып, қысқа мерзімде толықтай сөндірілді. Ұлттық парк алдағы уақытта да өртке қарсы техникалық жарақтандыруды күшейту жұмыстарын жалғастырады.
Ауыр техниканың да маңызы зор. Парк қарамағында жүк көтергіштігі үштен бес тоннаға дейінгі бес трактор және төменгі санаттағы он сегіз трактор бар. Олар минералдандырылған жолақтарды жасау және тазалау, орман шаруашылығы жұмыстарын жүргізу, қолайсыз ауа райының салдарын жою, инфрақұрылымды күтіп ұстау және басқа да міндеттерді орындау үшін пайдаланылады. Осы арнайы техниканың көмегімен қызметкерлер 95 шақырым жаңа минералдандырылған жолақ жасап, бұрыннан бар жолақтарға күтім жұмыстарын жүргізді. Алдағы уақытта тағы он трактор сатып алу жоспарланып отыр. Бұл атқарылатын жұмыстар көлемін едәуір арттыруға мүмкіндік береді.
Күнделікті патрульдеу жұмыстарының негізгі салмағын мемлекеттік инспекторлардың автопаркі көтереді. Қазіргі таңда «Бурабай» мемлекеттік ұлттық табиғи паркінде 51 патрульдік автокөлік пайдаланылуда. Оның ішінде он көлік ұлттық паркке 2025 жылы жеткізілді. Жақын арада автопарк жаңартуды жалғастырады. Тағы он екі патрульдік автокөлік сатып алу жоспарланған. Бұл табиғат қорғау заңнамасын бұзу фактілеріне және төтенше жағдайларға жедел ден қою мүмкіндігін арттырады. Биыл ерекше қорғалатын табиғи аумақтардың режимін бұзғаны үшін 127 әкімшілік хаттама толтырылды.
Арнайы міндеттерді орындау үшін екі бульдозер, он квадроцикл, он бір қарда жүретін техника, төрт мотоцикл, екі қайық және жиырма екі қызметтік жылқы пайдаланылады. Әрбір техниканың өзіне тән қызметі бар. Квадроциклдер жылы мезгілде ойлы-қырлы жерлерде жылдам қозғалуға мүмкіндік береді. Қарда жүретін техникалар қыста шалғай аумақтарға жетуге жағдай жасайды. Қайықтар көл айдындарын патрульдеу кезінде қолданылады. Ал автокөлік өте алмайтын жерлерде инспекторлар қызметтік жылқыларды пайдаланады.
Заманауи табиғат қорғау жүйесін цифрлық технологияларсыз елестету мүмкін емес. Қазіргі таңда ұлттық паркте он ұшқышсыз ұшу аппараты пайдаланылады. Олар қолжетімсіз аумақтарды бақылауға, табиғат қорғау заңнамасын бұзу деректерін анықтауға, өрт жағдайын қадағалауға және орман алқаптарының жай-күйін бағалауға мүмкіндік береді.
Бейнебақылау жүйесін дамытуға да ерекше көңіл бөлінуде. Бүгінде парк аумағында орман өрттерін ерте анықтауға арналған он үш бейнекамера жұмыс істейді. Олар түтінді дер кезінде анықтап, оқиға орнына күштерді жедел жіберуге мүмкіндік береді. Сонымен қатар жеті бақылау алаңына табиғат қорғау заңнамасын бұзу фактілерін анықтау және келушілердің тәртібін арттыру мақсатында бейнебақылау камералары орнатылады.
Техниканы кезең-кезеңімен жаңарту – ең алдымен адамдардың қауіпсіздігі мен табиғатты сақтауға бағытталған инвестиция. Заманауи автокөліктер, арнайы техника, ұшқышсыз жүйелер және бейнебақылау құралдары мемлекеттік инспекторларға өрттерді жедел анықтауға, заң бұзушылықтардың алдын алуға, қоғамдық тәртіпті қамтамасыз етуге және Бурабайдың бірегей табиғи кешендерін келер ұрпақ үшін сақтауға мүмкіндік береді.
