Қыс мезгілі басталғалы бері Степняк қаласындағы жылумен қамту мәселесі қайтадан күн тәртібіне шықты. Жыл сайын қайталанатын бұл жағдай биыл да тұрғындардың алаңдаушылығын күшейтіп отыр. Қала халқы салқын пәтерлерде өмір сүруге мәжбүр болса, коммуналдық инфрақұрылымның жай-күйі жүйелі проблемалардың әлі де шешімін таппағанын аңғартады.
Тұрғындардың айтуынша, қалалық қазандықтардың жұмысы тұрақсыз. Кейбір аудандарда жылу бірде бар, бірде жоқ. Әсіресе шеткері ықшамаудандарда жағдай күрделі. Бұған қоса, от жағушылардың жетіспеушілігі, кадр тұрақсыздығы, жалақының кешіктірілуі секілді мәселелер ахуалды одан әрі ушықтырып отыр. Көпшілік негізгі себептердің бірі ретінде қазандықтарға жеткізілетін көмірдің сапасына күмән келтіреді. Сапасы төмен отын салдарынан қазандықтарды жиі тоқтатып, тазалауға тура келеді, ал бұл өз кезегінде жылудың уақытша өшуіне әкеледі.
Орталық қазандық әзірге жұмысын бірқалыпты жалғастырып отыр. Алайда қалған нысандарда іркілістер жиі тіркеледі. Бұл жағдай тұрғындардың коммуналдық қызметке деген сенімін әлсіретіп, әлеуметтік наразылықтың өсуіне себеп болуда.
Тағы бір назар аударарлық жайт — абоненттермен жұмыс барысы. Кейбір тұрғындар төлем жасаған кезде фискалдық чек берілмейтінін, кассалық аппараттың ұзақ уақыттан бері істен шыққанын айтады. Соған қарамастан, қарыз көлемі өсіп келеді. Бұл мәселе де қоғам тарапынан орынды сұрақ туғызуда.
Осыған байланысты Біржан сал ауданының тұрғын үй-коммуналдық шаруашылық бөлімі ресми түсініктеме берді. Ведомство өкілдерінің айтуынша, Степняк қаласындағы жылумен қамту саласындағы қиындықтар бір күнде пайда болмаған, олар бірнеше жыл бойы қордаланған жүйелі мәселелер. Аталған бағыттағы жұмыс тұрақты бақылауда екені атап өтілді.
Мамандардың мәліметінше, ағымдағы жылыту маусымы күрделі жағдайда өтіп жатыр. Бұған білікті кадрлардың тапшылығы әсер етуде. Дегенмен қазіргі уақытта от жағушылардың штаты толық жасақталған, ауысым кестелері қайта қаралып, еңбек процесін оңтайландыру шаралары қолға алынған.
Ресми ақпаратқа сәйкес, қаладағы барлық қазандықтар штаттық режимде жұмыс істеп тұр, жылу тасымалдағыштың параметрлері қолданыстағы нормативтерге сай. Абылайхан шағынауданындағы қазандыққа қатысты мәселелер бақылауда ұсталып, инженерлік-техникалық қызметкерлердің тәулік бойғы кезекшілігі ұйымдастырылған. Тұрғын үйлер мен әлеуметтік нысандардағы температуралық режим тұрақты түрде қадағалануда.
Көмір сапасына қатысты да ресми ұстаным айтылды. Қазандықтарға жеткізілген отын зертханалық тексеруден өткен. Сынақ қорытындысына сәйкес, көмір нормативтік-техникалық талаптарға толық жауап береді. Көмір қоры жеткілікті көлемде қалыптастырылған.
Ал абоненттермен жұмысқа, оның ішінде төлемдердің фискализациясы мен кассалық жабдықтардың жұмысына қатысты мәселелер бойынша «Степняк Су» кәсіпорнының басшылығына нақты тапсырмалар берілген. Анықталған кемшіліктер заң талаптарына сәйкес қысқа мерзімде жойылуға тиіс.
ТКШ бөлімі тұрғындармен және бұқаралық ақпарат құралдарымен ашық диалогқа дайын екенін жеткізді. Барлық өтініштер қаралып, проблемалы учаскелерге мамандар жіберіліп, жедел шешімдер қабылданып жатыр.
Дегенмен, мәселенің түйіні ресми есептерде емес, тұрғындардың тұрмыс сапасында екені анық. Қыс енді ғана басталды. Ал алдағы айлар Степняктағы жылумен қамту жүйесінің шынымен тұрақты арнаға түсе ме, әлде жыл сайынғы үйреншікті сценарий қайта қайталана ма — соны айқындап бермек.
