Сандықтау ауданына жұмыс сапары барысында Ақмола облысы әкімінің орынбасары Мұрат Балпан бірқатар ауыл шаруашылығы кәсіпорындарын аралап, агроөнеркәсіптік кешендегі инвестициялық жобалардың жүзеге асырылу барысымен танысты.
Облыс әкімінің орынбасары «Жабай» ЖШС егістік алқаптарында болып, ауыл шаруашылығы дақылдарының жай-күйін көрді. Биыл шаруашылықтың жалпы егіс көлемі 7,9 мың гектарды құрады.
«Егіс науқаны белгіленген мерзімде аяқталды. Қазіргі таңда негізгі назар егістіктерді күтіп-баптауға және барлық агротехнологиялық талаптардың сақталуына аударылуда. Егістіктегі қазіргі жағдай мол өнім алуға мүмкіндік береді», – деді серіктестік басшысы Дога Докаев.
Максимовка ауылында Мұрат Балпанға ірі инвестициялық жобалар таныстырылды. Қазіргі уақытта мұнда 340 сиыр мен бұзауға арналған репродукторлық ферма салынуда, ауыл шаруашылығы алқаптарын суару жүйесі дамытылуда, сондай-ақ жасымық өңдеу цехының құрылысы жалғасуда. Цех құрылысына тартылған инвестицияның жалпы көлемі кәсіпорынның өз қаражаты есебінен 1,3 млрд теңгені құрайды. Нысанның өндірістік қуаты сағатына 5 тонна өнім өңдеуге жетеді. Өндірістік желіні іске қосу 2026 жылдың қыркүйек айына жоспарланған.
Сонымен қатар кәсіпорын аумағында сыйымдылығы 14 мың тонна болатын көкөніс қоймасының құрылысы жоспарланып отыр. Ол 2027 жылы пайдалануға беріледі.
«Кәсіпорынды дамытуға бағытталған инвестициялық жобалар өндірістік мүмкіндіктерді кеңейтуге, жұмыс тиімділігін арттыруға және өңірдің агроөнеркәсіптік кешенінің дамуына өз үлесін қосуға мүмкіндік береді», – деп атап өтті «Максимовское» ЖШС басшысы Александр Закусилов.
