ҚР Мәдениет және ақпарат министрлігінің «Геральдикалық зерттеулер орталығы» мен Қосшы қаласы әкімдігі бірлесіп мемлекеттік рәміздерді ұлықтау, оларды құрметтеу және кеңінен насихаттау мақсатында танымдық семинар өткізді. Іс-шара мемлекеттік нышандардың қоғамдағы орны мен олардың мән-маңызын терең түсіндіруге бағытталды.
Семинар барысында спикерлер мемлекеттік рәміздерді пайдалану тәртібіне тоқталып, олардың тарихи қалыптасуы мен символдық мазмұнына жан-жақты шолу жасады. Мемлекеттік Ту, Елтаңба және Әнұранның әрбір элементі елдің тәуелсіздігі, мемлекетшілдік дәстүрі мен ұлттық рухының көрінісі екені атап өтілді.
Геральдикалық зерттеулер орталығының негізгі қызметі жөнінде орталық директорының м.а. Шерхан Талапұлы Талапов, мемлекеттік рәміздерді қолдану тәртібі туралы Ведомстволық және өзге де наградаларды сараптау бөлімінің басшысы Әділхайыр Ерзатұлы Мырзаханов, ал рәміздердің тарихи бастаулары жөнінде Геральдикалық зерттеулер бөлімінің басшысы Асылжан Самиғоллаұлы Бижанов мазмұнды баяндама жасады.
Спикерлер мемлекеттік рәміздерге қатысты заңнамалық талаптарды, олардың сақталу мәдениетін және геральдикалық стандарттарға қойылатын талаптарды түсіндіріп, тыңдаушылардың сұрақтарына жауап берді.
Мемлекеттік рәміздерге құрмет көрсету – ұлттық бірегейліктің маңызды бөлігі екені айтылған шараға мемлекеттік қызметшілер, мәслихат депутаттары мен қалалық құрылымдардың өкілдері қатысты. Ұйымдастырушылардың айтуынша, мұндай кездесулер қоғамда патриоттық рухты күшейтуге, мемлекеттік нышандардың мәртебесін арттыруға зор ықпал етеді.
