Қосшыда бизнес-идеяларды дамытуға арналған гранттарға сұраныс жоғары

Қосшы қаласында кәсіпкерлікті қолдау аясында жаңа бизнес-идеяларды жүзеге асыруға арналған мемлекеттік гранттарға сұраныс жыл сайын артып келеді.

Өтінімдерді қабылдау мен қарау рәсімдері толығымен электронды форматқа көшіріліп, Business.enbek.kz порталы арқылы жүргізіледі. Бұл шара ашықтықты арттырып, адами факторды азайтуға және үміткерлер үшін қолайлы жағдай жасауға мүмкіндік береді.

Қатысу талаптары

Мемлекеттік грантқа өтінім беру үшін келесі талаптарға сәйкес болу қажет:

• тіркелген жұмыссыздар;

• жеке кәсіпкер (тіркелгеніне 3 жылға дейін).

Сонымен қатар, үміткерлер төмендегі әлеуметтік санаттардың біріне жатуы тиіс:

• мүмкіндігі шектеулі тұлғалар;

• «қандас» мәртебесі бар азаматтар;

• өңіраралық қоныс аударушылар;

• аз қамтылған отбасы мүшелері;

• көпбалалы отбасы мүшелері (жұбайы/жары);

• мүгедектігі бар баланы тәрбиелеп отырған тұлғалар;

• асыраушысынан айырылу бойынша жәрдемақы алушылар.

Грант қаражатын пайдалану бағыттары

Грант қаражаты тек нақты кәсіпкерлік мақсаттарға жұмсалады:

• инвентар, құрал-сайман, технологиялық жабдық сатып алу;

• мал, құс, жануарлар алу.

Грант келесі мақсаттарға берілмейді:

• тұтынушылық мақсаттарға;

• кредиттерді өтеуге;

• тұрғын үй сатып алу немесе салуға;

• жер телімдерін сатып алуға;

• акцизделетін өнім өндіруге.

Өтінімдерді қабылдау тәртібі

Өтінімдер Business.enbek.kz порталы арқылы қабылданады:

• 1-ағын – 2025 жылғы 21 мамыр;

• 2-ағын – 2025 жылғы 11 тамыз;

• 3-ағын – 2025 жылғы 20 қазан – 3 қараша.

Грант көлемі — 400 АЕК (1 572 800 теңге).

Өтінім беру барысында қатысушылар:

1. порталға тіркеледі;

2. сертификат алады;

3. грант алу шарттарына сәйкестігі тексеріледі;

4. бизнес-жоспар жүктейді;

5. электронды форманы толтырады.

Барлық өтінімдер 2021–2025 жылдарға арналған «Кәсіпкерлікті дамыту» ұлттық жобасы аясында құрылған комиссияда қаралды.

Нәтижелер

1-ағын:
– 23 өтінім қабылданды;
– 6 өтінім мақұлданды;
– 17 өтінім кері қайтарылды.

2-ағын:
– 18 өтінім қабылданды;
– 7 өтінім мақұлданды;
– 11 өтінім кері қайтарылды.

3-ағын:
– 13 өтінім қабылданды;
– 7 өтінім мақұлданды;
– 6 өтінім кері қайтарылды.

Жалпы, 20 азамат мемлекеттік грант иегері атанып, өз бизнес-идеяларын жүзеге асыруда.

Грант иегерлерінің бизнес бағыттары

Қаржылай қолдау алған жобалар қала экономикасының әртүрлі саласын қамтиды:

• жылыжайда көкөніс өсіру;

• дизайн студиясын дамыту;

• жиһаз жасау цехы;

• мұз өндіру және сату;

• сұлулық салондарын ашу;

• массаж кабинеттерін ұйымдастыру;

• түйе және қой жүнінен тоқыма өнімдерін шығару;

• автокөлік диагностикасы;

• ғимарат қасбеттеріне арналған панельдер өндірісі;

• ұлттық ою-өрнекке негізделген графикалық қызметтер;

• қала көрнекілік брендтерін жасау;

• «SHADOW SHOW» көлеңке театрын дамыту;

• жаңа туған нәрестелерге арналған бұйымдар тоқу;

• сублимациялық аппликация және гибридті сәндік бұйымдар шеберханасы.

Мемлекеттік гранттар кәсіпкерлерге өз идеяларын өмірге асыруға, шағын және орта бизнеске серпін беруге мүмкіндік туғызады, бұл өңір экономикасын дамытуда маңызды рөл атқарады.