Макинск қаласында арық сулардың қызғылт-қызыл түске боялуы жұртшылықтың алаңдаушылығын тудырды. Осыған байланысты Nayzakokshe.kz ақпарат агенттігі кезекті қоғамдық бақылау материалын жариялап, экологиялық қауіптің бар-жоғына назар аудартты.
Қала тұрғыны Мұрат Раков жолдаған бейнематериалда көшелердегі арықтармен ағып жатқан судың қалыптан тыс түсі анық байқалады. Әсіресе, бұл жағдай «Доброцен» дүкені маңында және теміржол бойында айқын көрінеді. Аталған сулар тұрғын үйлердің арасымен өтіп, батпақты алқап арқылы Қайрақты өзеніне құятыны белгілі болды.
Мәселе тек судың түсінде ғана емес. Тұрғындарды оның қыс мезгілінде қатпай ағуы, шығу көзі мен қауіп деңгейі алаңдатып отыр. Осыған орай бірқатар сауал туындады.
Аталған жарияланымнан кейін тиісті мемлекеттік органдарға ресми сұрау жолданып, жедел әрекет жасалды. Жексенбі күні Макинск қаласына ведомствоаралық комиссия шығып, оқиға орнына мониторинг жүргізді.
Ақмола облысы бойынша Экология департаментінің мемлекеттік инспекторы Әділбек Аяғановтың мәлімдеуінше, қала және аудан әкімдігі, санитариялық-эпидемиологиялық қызмет, сондай-ақ Буланды ауданының төтенше жағдайлар бөлімі өкілдерімен бірлесіп тексеру ұйымдастырылған.
– Nayzakokshe.kz агенттігінде жарияланған материал негізінде З.Космодемьянская көшесінде, теміржолға жақын, «Доброцен» дүкені маңындағы арықта пайда болған қызғылт түсті суға байланысты тексеру жүргізілді. Бірнеше нүктеден су сынамалары алынып, ластаушы заттардың құрамын анықтау үшін Астана қаласындағы Экология департаментінің зертханасына жолданды, – деді инспектор.
Алдын ала мониторинг нәтижелері бойынша, қызғылт түсті судың шығу тегі Макинск жылу оқшаулау зауытының аумағымен байланысты болуы мүмкін деген болжам айтылып отыр. Сонымен қатар, бұл дерек бойынша Буланды ауданының полиция бөліміне ресми өтініш берілген.
Қазіргі таңда сараптама қорытындысы күтілуде. Мамандар түпкілікті шешім зертханалық талдау нәтижелерінен кейін ғана жарияланатынын атап өтті.
Мәселенің экологиялық және санитарлық салдары барынша мұқият зерттелуі тиіс. Себебі ластанған судың ашық ортада таралуы қала тұрғындарының денсаулығына, табиғи экожүйеге кері әсер етуі ықтимал.
Әзірге жағдай бақылауда. Алайда қоғамдық қауіпсіздік пен қоршаған ортаны қорғау мәселесінде ашықтық пен жеделдік аса маңызды. Макинск жұртшылығы жауапты органдардан нақты әрі толық ақпарат күтуде.
Посмотреть эту публикацию в Instagram
