Ш.Уәлиханов атындағы Көкшетау университетінде әдебиеттанушы-ғалым, Асылбек Байтанұлының «Мәлік Ғабдуллин. Ғибратты ғұмыр» атты кітабының тұсаукесері өтті.
Шараға зиялы қауым мен қоғам қайраткерлері , М.Ғабдуллин атындағы азаматтық қорғау академиясының өкілдері, университеттің профессор-оқытушылар құрамы және студенттер қатысты.
Асылбек Байтанды көкшеліктер Мәлік Ғабдуллин музейінде қызмет істеген уақыттан бастап батыр тұлғасын ұзақ жылдар бойы дәріптеп, еңбектерін зерттеп-зерделеген, қолынан қаламын тастамаған ғалым, қазақ руханиятының жанашыры деп біледі.
Танымдық еңбекке автордың Мәлік Ғабдуллин туралы зерттеулері, музейде қызмет істеген жылдардағы тағылымды іс-сапарларының баяндамалары, естеліктері енген.
Іс-шараның модераторы, М.Ғабдуллин мұражайдың директоры Мұхаммед Қонқаев қатысушы қонақтарды таныстырып, автордың музейде жұмыс істеген жылдардағы еңбегін ерекше атап өтті.
Құттықтау сөздің шымылдығын ашқан жазушы-драматург, қоғам қайраткері Жабал Ерғалиұлы жарық көрген кітаптың – Мәліктану ғылымындағы ұзақ ізденістің, терең ой мен табанды еңбектің жемісі дей келе, кітап авторы Асылбек Байтанұлына Ақмола облысы әкімінің орынбасарының хатын табыстады.
Шара соңында Ақмола облысы бойынша Мемлекеттік кірістер департаментінің қызметкері Нұрлан Ысқақов батырдың қызы Майдан Мәлікқызының және туған-туыстарының атынан авторға және мұражайға алғысын білдірді.
Көкшетаулық достары Асылбек Байтанұлының иығына шапан жауып, ақ тілектерін жаудырды.
Осылайша, кітап қалың оқырманға жол тартты.
Университет қабырғасындағы Мәлік Ғабдуллин атындағы клуб мүшелері Батырға арналған арнау өлеңдерін нақышына келтіріп оқыды.
Асылбек Байтанұлының бұл еңбегі Мәліктану ғылымына қосылған жемісті еңбек, қазақ әдебиеті мен руханиятының дамуына қосылған сүбелі үлес деп білеміз.
