Төрт жыл. Дәл осынша уақыттан бері Көкшетаудың басты көшелерінің бірі – батыр Мәлік Ғабдуллиннің аты берілген көше жөнделіп жатыр. Жыл сайын билік өкілдері: «Биыл аяқтаймыз» дейді. Жыл сайын жаңа сылтау айтылады. Енді міне, тағы бір сандар жария болды: жөндеуді бітіру үшін қосымша 750 миллион теңге керек екен.
Ал тұрғындар үшін бұл жай ғана сандар емес – күнделікті әурешілік. №6 мектеп, балабақшалар, коррекциялық орталықтар, көпқабатты үйлер – барлығы осы көшеде. Жолдың бітпеуі көлік жүргізушілерге де, жаяу жүргіншілерге де қолайсыздық туғызуда. Машиналар ой-шұңқырдан амалсыз өтеді немесе аулаларды айналма жолға айналдырған. «Табыс» дүкенінің жанындағы тар көше қазір көлікке толы. Жанында балалар жүретін балабақша мен тұрғын үйлер. Қауіптің қақ ортасы.
«Аманат» партиясының жиынында бұл мәселе тағы көтерілді. Облыстық жолаушылар көлігі және автомобиль жолдары басқармасының басшысы Владимир Кулаковтың сөзінше, қосымша қаржы бөлінбейінше көшені ашу мүмкін емес.
Алайда халық уәдені тыңдаудан жалықты. «Ақша жетпеді», «жоспар өзгерді» деген сылтаулар жыл сайын қайталанып келеді. Ал көшенің нақты қашан пайдалануға берілетіні әлі белгісіз.
Көкшетаулықтардың сұрағы орынды: қарапайым қала көшесі қалайша көпжылдық құрылысқа айналды? Және оған кім жауап береді?
