Көкшетаудағы Ү.Ыбырай атындағы Ақмола облыстық филармониясында қоғам қайраткері Мұрат қажы Ыдырысұлының туғанына 80 жыл толуына арналған «Абылай хан және ұлттық бірегейлік» тақырыбындағы халықаралық ғылыми-тәжірибелік конференция өтті.
Тағылымды жиынды Ш.Уәлиханов атындағы Көкшетау университетінің қауымдастырылған профессоры, тарих ғылымдарының кандидаты Марат Өтегенов ашып, жүргізіп отырды.
Конференция барысында Л.Н. Гумилев атындағы Еуразия ұлттық университетінің, ҚР БҒМ Мемлекет тарихы институтының, Әлишер Науаи атындағы Ташкент мемлекеттік өзбек тілі мен әдебиеті университетінің, Шараф Рашидов атындағы Самарқанд мемлекеттік университетінің, сондай-ақ Ш. Уәлиханов атындағы Көкшетау университетінің белгілі тарихшы-ғалымдары мен профессорлары мазмұнды баяндамалар жасап, Абылай хан дәуірінің тарихи мәні мен ұлттық бірегейлікті қалыптастырудағы рөлі жан-жақты талқыланды.
Сонымен қатар, облыс әкімінің орынбасары Алтынай Әміренова мерейтой иесіне облыс әкімінің Алғыс тапсырды.
Ғылыми бөлімде көтерілген мәселелер қатарында қазақ мемлекеттілігінің сабақтастығы, тарихи жадыны жаңғырту, ұлттық құндылықтарды дәріптеу бағыттары кеңінен сөз болды.
Жиынның мәдени бағдарламасы да мазмұнды өрбіді. Мұрат қажы Ыдырысұлының өмірі мен шығармашылығына арналған арнайы бөлімде Ж. Мусин атындағы жоғары педагогикалық колледжі ұжымы, К.Күмісбеков атындағы қазақ ұлт-аспаптар оркестрі, Ш.Құсайынов атындағы Ақмола музыкалық-драма театрының өнерпаздары және «Абылай ханның қара жолы» экспедициясының мүшелері өнер көрсетіп, көпшілікке рухани әсер сыйлады.
Тағылымы терең тағзым жиыны ұлт тарихын ұлықтап, елдік сананы нығайту жолындағы маңызды басқосуға айналды.
