Ақмола облысының «Көкше Цемент» кәсіпорнында жұмыс істейтін қызметкерлер еңбекақының уақытылы берілмеуіне шағымданды. Олардың айтуынша, бұл мәселе бірнеше ай қатарынан қайталанып келеді.
Редакциямызға хабарласқан жұмысшылардың бірі:
«Өткенде әлеуметтік желіде мәселе көтерілген соң бірден ақша түскен еді. Бірақ осы айда жағдай тағы қайталанып отыр. Біз жұмысымызды адал істейміз, бірақ еңбекақымызды алу үшін әр жолы шу көтеруге мәжбүрміз», – дейді.
Кәсіпорынның жұмысшылары тарапынан наразылық күшейген. Олардың көпшілігінің отбасы, төленетін несиесі бар. Жұмысшылардың сөзінше, зауыт басшылығы еңбекақының кешігуіне қатысты түсініктеме бермеген.
Бұл – «Көкше Цемент» зауытындағы жалақы мәселесінің бірінші рет көтеріліп отырған жоқ. Бұған дейін әлеуметтік желіде жарияланған ақпараттан кейін ғана қаражат берілген болатын.
Жергілікті белсенділер мұндай жағдайды еңбек заңнамасының өрескел бұзылуы деп санайды.
«Жалақы – бұл адамдардың ең негізгі құқығы. Егер кәсіпорын уақытында төлемесе, жұмысшылардың еңбек инспекциясына немесе сотқа жүгінуіне толық құқығы бар», – дейді заңгер әрі құқық қорғаушы.
Қазір зауыттағы ахуалға қатысты ресми түсініктеме алу мүмкін болмады. «Nayzakokshe.kz» редакциясы кәсіпорын басшылығына ресми сауал жолдады.
Жұмысшылар билік пен жауапты органдарға үндеу жолдап, жағдайға назар аударуды сұрайды.
