Ақмола облысының Ерейментау ауданында үйлену тойында уланған жеті адамның жағдайына қатысты ресми түсініктеме берілді, деп хабарлайды Nayzakokshe.kz тілшісі.
Санитариялық-эпидемиологиялық бақылау департаментінің мәліметінше, зертханалық зерттеу нәтижесінде тағам өнімдерінен ішек инфекциясын тудыратын бактериялар табылған.
«11 қазан күні Ерейментау ауданындағы медициналық ұйымдарға бір қоғамдық тамақтану нысанында болғаннан кейін өзін жайсыз сезінген жеті адам жүгінді. Сараптама қорытындысында тағам сынамаларында оң нәтижелер анықталды. Барлық науқастардың жағдайы қанағаттанарлық, жаңа деректер тіркелген жоқ», – делінген ведомствоның мәлімдемесінде.
Мамандардың айтуынша, тамақтану орнында дезинфекциялық және тексеру шаралары жүргізілген, ал кәсіпкерге қатысты санитарлық ережелерді бұзғаны үшін әкімшілік шаралар қолданылған.
Сонымен қатар, бұл дерек бойынша материалдар ҚР Қылмыстық кодексінің 304-бабы («Санитариялық ережелерді немесе гигиеналық нормативтерді бұзу») бойынша Ерейментау аудандық полиция бөліміне жолданған.
«Қазір барлық зардап шеккендердің жағдайы тұрақты. Медициналық бақылау жалғасып жатыр», – деп толықтырды департамент өкілдері.
Еске салайық, 11 қазанда Ерейментау ауданындағы ауылдардың бірінде өткен үйлену тойынан кейін бірнеше адам жедел ішек инфекциясымен ауруханаға түскен болатын.
