Ақмола облысының Бурабай ауданында кәмелетке толмаған қызға қатысты қозғалған қылмыстық іс бірнеше айдан бері тоқтап тұр. Тергеу баяу жүріп, күдіктілердің бірі — бұрынғы полицей — жазадан сытылып кетуі мүмкін деген күдік күшейді, деп хабарлайды Nayzakokshe.kz тілшісі Esilnews.kz cілтеме жасап.
Іс қалай басталды
Бұл іс 2025 жылдың наурыз айында Бурабай аудандық полиция бөлімінде тіркелген. Тергеу барысында екі күдікті анықталған. Алайда уақыт өте келе жағдай күрт өзгерді:
-
Бір күдіктіге қатысты іс толықтай тоқтатылған;
-
Ал екіншісінің әрекеті Қылмыстық кодекстің 122-бабы (Кәмелетке толмағанмен жыныстық қатынас) бойынша емес, 121-1-бапқа («16 жасқа толмаған адамға жыныстық сипаттағы тиісу») жеңілдетіліп қайта сараланған.
Бұл бап бойынша ең ауыр жаза — айыппұл, түзеу жұмыстары немесе 50 тәулікке дейін қамау.
Ата-ананың үміті мен прокурордың уәдесі
Қыздың ата-анасы мен олардың адвокаты 2025 жылдың шілдесінде Ақмола облысының прокурорымен кездескен. Сол кезде прокурор істің міндетті түрде сотқа жіберілетінін уәде еткен.
Бірақ арада айлар өтсе де, істі полиция департаменті сотқа жолдамаған. Керісінше, тергеу созылып, іс тоқтап қалған.
Күдіктілердің бірі — бұрынғы полицей
Жәбірленуші тараптың айтуынша, күдіктілердің бірі — полиция органдарының бұрынғы қызметкері.
Сол себепті, олар «бұрынғы әріптесін» қорғауға тырысып отыр деген пікір қалыптасқан.
Тергеу барысындағы өрескел әрекеттер
Жәбірленуші тараптың айтуынша, қызды тергеген тергеуші оған қорлайтын және орынсыз сұрақтар қойған.
Салдарынан жасөспірім өзіне кінә артып, терең психологиялық күйзеліске түскен.
Ең бастысы — істің мәні өзгермейді
Заңгерлердің айтуынша, бұл жағдайда басты мәселе — қылмыстың жеңілдетіліп жіберілуі.
Өйткені кәмелетке толмаған қызбен манипуляция, алдау немесе күш көрсету арқылы жыныстық қатынасқа түсу — бұл 122-бап емес, 120-бап, яғни кәмелетке толмағанды зорлау саналады.
Мұндай әрекет үшін заң бойынша өмір бойына бас бостандығынан айыру жазасы қарастырылған.
Қоғамдық сұрақ: әділдік қашан орнайды?
Қазір қоғамда басты сұрақ туындап отыр — Не себепті іс тоқтатылды? Кім қорғап отыр күдіктілерді?
Бұл сұрақтарға Ақмола облысының прокуратурасы мен Полиция департаменті нақты жауап беруі тиіс.
Өйткені мұндай істерді жабу — тек бір отбасының емес, қоғамның әділетке деген сенімін жою.
Ескерту: Бұл ақпарат @nemolchikz_official парақшасында жарияланды. Редакция бұл істің тергелу барысын бақылауда ұстайды.
Кәмелетке толмағандарға қатысты зорлық-зомбылық фактілері бойынша жазасыз қалу — қоғамның моральдық иммунитетін әлсіретеді.
Еске сала кетейік, бұдан бұрын Түркістан облысында 71 жастағы ер адам 15 жастағы қызды жүкті қылғанын жазған едік.
