«Бурабай» мемлекеттік ұлттық табиғи паркінің инспекторлары қысқы маусымның қорытындысын шығарып, «Таза Қазақстан» акциясы аясында ұлттық парк аумағын қоқыстан тазарту жұмыстарын жалғастыруда. 2026 жылғы 1 желтоқсан мен 28 ақпан аралығында «Бурабай» МҰТП қызметкерлері 263 текше метр тұрмыстық қалдықты жинап, сыртқа шығарды. Негізгі жүктеме көлдердің мұзындағы танымал қысқы демалыс орындарына түседі.
Қалдықтардың едәуір бөлігі демалыс және мереке күндерінен кейін жиналады. Көл мұзында және жағалау аймақтарында пластик бөтелкелер, пакеттер, азық-түлік қаптамалары, бір реттік ыдыстар мен басқа да тұрмыстық қоқыс қалып қояды. Көктемде мұз еріген кезде бұл қалдықтардың барлығы суға түсіп, көлдердің экожүйесіне зиян келтіруі мүмкін.
Инспекторлардың жұмысы тек су айдындарымен шектелмейді. Ұлттық парк аумағындағы орман алқаптары мен туристік соқпақтарды тазарту жұмыстары тұрақты түрде жүргізіледі. Бұл шаралар табиғи аумақтардың тазалығын сақтауға және қоршаған ортаға ұқыпты қарау мәдениетін қалыптастыруға бағытталған «Таза Қазақстан» экологиялық акциясының бір бөлігі болып табылады.
Профилактикалық жұмыстармен қатар ұлттық парк табиғатты қорғау заңнамасын бұзғаны үшін әкімшілік жауапкершілік бар екенін де ескертеді. Қыс мезгілінің үш айында «Ерекше қорғалатын табиғи аумақтардың қорғау режимін бұзу» бабы бойынша 34 дерек тіркеліп, әрқайсысына 10 АЕК көлемінде айыппұл салынды. Сондай-ақ бір келуші «Орманды қалдықтармен бүлдіру, ластау немесе орман қоры жерлеріне өзге де зиян келтіру» бабы бойынша 20 АЕК мөлшерінде айыппұл төледі.
Ұлттық парк әкімшілігі Бурабай табиғатын сақтау тек инспекторлардың жұмысына ғана емес, келушілердің жауапкершілігіне де байланысты екенін еске салады. «Бурабай» МҰТП әкімшілігі өңір тұрғындары мен қонақтарын табиғат аясында демалу кезінде қарапайым ережелерді сақтауға шақырады: қоқысты өзімен бірге алып кету және қоршаған ортаға ұқыпты қарау.
«Таза Қазақстан» экологиялық акциясы алдағы уақытта да жалғасады, ал ұлттық парк инспекторлары аумақты тазарту шараларын жүйелі түрде өткізетін болады. Мәселен, 2026 жылғы 21 наурызда «Бурабай» МҰТП аумағындағы барлық көлдерде «Таза мұз» экологиялық акциясын өткізу жоспарланып отыр. Оған кез келген ниет білдіруші қатыса алады. Еріктілер «Бурабай» МҰТП орталық кеңсесіне мына мекенжай бойынша хабарласа алады: Бурабай кенті, Кенесары көшесі 47 «Б», немесе 8 (71636) 71236 телефонына қоңырау шала алады.
