Көкшетау қаласындағы «Қоғамдық келісім» КММ жанындағы Достық үйі алаңында Халықаралық балаларды қорғау күніне арналған «Біз бақытты баламыз» атты мерекелік іс-шара өтті. Тағылымды шара облыстық Аналар кеңесі мен «Qolqanat» әлеуметтік жобасының ұйымдастыруымен жүзеге асты.
Мерекелік жиынға инклюзивті балалар мен олардың ата-аналары, волонтерлар және Аналар кеңесінің мүшелері қатысып, ортақ қуанышқа бөленді. Бүлдіршіндер аниматорлармен бірге түрлі ойындарға қатысып, би флешмобында өнер көрсетіп, шаттыққа толы көңіл күй сыйлады.
Іс-шара аясында «Әрқашан күн сөнбесін…» тақырыбында асфальтта сурет салу байқауы ұйымдастырылып, балалар өз қиялдары мен шығармашылық қабілеттерін паш етті. Сонымен қатар, концерттік бағдарламада жас өнерпаздар ән шырқап, би билеп, көрермендердің ыстық ықыласына ие болды.
Мереке соңында белсенділік танытқан балалар түрлі номинациялар бойынша марапатталып, дипломдар мен бағалы сыйлықтарға ие болды.
Ұйымдастырушылардың айтуынша, мұндай игі бастамалардың басты мақсаты – әр баланың бақытты балалық шағын қамтамасыз етуге қолдау көрсету, олардың шығармашылық әлеуетін дамыту және қоғамда мейірімділік пен достық құндылықтарын кеңінен насихаттау.
Балалар – ел болашағы. Олардың жарқын күлкісі мен алаңсыз балалық шағы – қоғам дамуының басты көрсеткіші. Осы орайда барша бүлдіршіндерді Халықаралық балаларды қорғау күнімен құттықтап, дендеріне саулық, өмірлеріне шаттық пен шуақ тілейміз.
