Ақмола облысына жұмыс сапары барысында Қазақстан Республикасының Премьер-Министрі Олжас Бектеновке Digital Aqmola орталығы базасында өңірдің цифрлық жобалары таныстырылды. Іске асырылып жатқан шешімдер туралы өңір басшысы Марат Ахметжанов және Ақмола облысының цифрландыру және архивтер басқармасының басшысы Мағжан Ержан баяндады.
Премьер-Министрге нақты уақыт режимінде облыс дамуының негізгі бағыттары бойынша деректер жиналып, талданатын Digital Aqmola ситуациялық орталығы таныстырылды. Салалық дашбордтардың көмегімен өңір басшылығы ауыл шаруашылығы, инвестициялар және экономиканың басқа да секторлары бойынша көрсеткіштерді жедел көре алады.
Сондай-ақ үлкен деректер массивін өңдеуге, мемлекеттік органдар үшін аналитикалық анықтамалар дайындауға және ашық дереккөздер мен Telegram-арналарды мониторингтеу негізінде өңірдің күнделікті ақпараттық дайджесін қалыптастыруға көмектесетін жасанды интеллект құралдары көрсетілді.
Бұдан бөлек, өңір қызметтері бір платформада біріктірілген байланыс орталығының жұмысы таныстырылды. Жаңа жүйенің арқасында қызметтердің әрекет ету жылдамдығы шамамен 2 есеге, ведомстволар арасындағы өзара іс-қимыл 1,5 есеге артты, ал тұрғындардың 98% өтініштері белгіленген мерзімде орындалады.
Digital Aqmola экожүйесінің бір бөлігі ретінде өңірдің бірыңғай дрон инфрақұрылымы да ұсынылды. Жоба Қазақтелеком АҚ-мен бірлесіп жүзеге асырылуда. Ұшқышсыз аппараттар аумақты мониторингтеуге, инфрақұрылымды бақылауға, су тасқыны жағдайын қадағалауға және түрлі оқиғаларға жедел әрекет етуге пайдаланылады. Дрондардан келетін бейне және деректер ағыны тікелей ситуациялық орталыққа түседі.
Сонымен қатар Ақмола облысының аграрлық секторын цифрландыру бойынша тартылған кеңесші Қайрат Сұлтанбеков «Кең дала 2» бағдарламасы аясында жеңілдетілген қаржыландыруға өтінім берудің цифрлық жүйесін таныстырды.
Жаңа жүйе фермерлерге қаржыландыруға өтінімдерді цифрлық платформа арқылы беруге мүмкіндік береді. Қажетті құжаттар мемлекеттік деректер базаларынан автоматты түрде алынады.
Жүйеде спутниктік мониторинг пен жасанды интеллект элементтері қолданылады: олар егіс алқаптарын талдап, өндірістік шығындарды есептейді, өнімділік пен шаруашылықтың қаржылық тиімділігін болжайды. Осы деректер негізінде нақты ауыл шаруашылығы өндірушісіне қажетті қаржы көлемі автоматты түрде анықталады.
Қаржыландыру цифрлық платформа мен маркетплейс арқылы жүзеге асады, бұл қарыз қаражатының қозғалысын және оның пайдаланылуын онлайн режимде — өтінім беруден бастап нақты игерілуі мен салық түсімдеріне дейін — бақылауға мүмкіндік береді.
Ұсыныстардың бірі ретінде ауыл шаруашылығы өндірушілерінің цифрлық жетілу индексін енгізу қарастырылды. Бұл жағдайда шаруашылықтың цифрландыру деңгейі мемлекеттік қолдау шараларын бөлу кезіндегі басымдыққа әсер етеді.
Қазіргі уақытта жүйе пилоттық форматта іске асырылған, алдағы уақытта оны Ақмола облысында кеңінен енгізу жоспарланып отыр.
