Ақмола облысында құқық қорғау органдары интернет-алаяқтық дерегіне жедел әрекет етіп, жергілікті тұрғынның алданған қаражатын қайтарып берді.
Оқиға әлеуметтік желі арқылы белгілі болды. Instagram желісіндегі қолданушы фейк аккаунт арқылы концерт билеттерін сатып алмақ болған кезде алаяқтың құрбанына айналғанын жазған. Белгісіз адам өзін жас қыз ретінде таныстырып, әйгілі Gorillaz тобының концертіне екі билет ұсынған. Әр билет құны 40 мың теңге деп көрсетілген.
Тараптар алдын ала келісім бойынша, сатып алушы билеттерді қолма-қол алғаннан кейін толық төлем жасауға уағдаласқан. Алайда кепіл ретінде жәбірленуші 40 мың теңгені алдын ала аударған. Ақша түскен соң «сатушы» түрлі сылтаулар айтып, билеттерді беруден жалтарып, қаражатты қайтарудан бас тартқан.
Өзін алданғанын түсінген азаматша екі күннен кейін Қосшы қаласының полиция бөліміне арызданды. Тексеру жұмыстарын жедел уәкіл Бахтияр Тлеукенов жүргізіп, жәбірленушінің түсініктемесін, хат алмасу деректерін және төлем құжаттарын зерделеу арқылы күдіктінің жеке басын қысқа мерзімде анықтады.
Тексеру барысында 18 жастағы азаматтың концерт билеттері расымен болғаны, алайда оларды басқа адамдарға сатып жіберіп, соған қарамастан жәбірленушіні әдейі жаңылыстырғаны белгілі болды. Күдіктімен профилактикалық әңгіме жүргізіліп, алаяқтық әрекеттер үшін көзделген құқықтық жауапкершілік түсіндірілді. Нәтижесінде жәбірленушіге аударылған қаражат толық көлемде қайтарылды.
Әлеуметтік желідегі жазбасында азаматша полиция қызметкерлеріне алғысын білдіріп, олардың жедел әрі кәсіби жұмысына жоғары баға берді.
Полиция департаменті азаматтарды интернет арқылы билет немесе өзге де тауарлар сатып алу кезінде аса сақ болуға шақырады. Құқық қорғау органдары бағасы шектен тыс арзан ұсыныстарға сенбеуге, сатушының жеке деректерін мұқият тексеруге және алдын ала төлем жасаудан барынша бас тартуға кеңес береді.
