Ақмола облысы білім басқармасының басшысы Айнагүл Балташева Сандықтау ауданында орналасқан жыл бойы жұмыс істейтін «Жас Дәурен» балалар сауықтыру лагерінің жұмысымен танысып, әлеуметтік осал топтардан шыққан балалардың демалыс жағдайын тексерді.
Қазіргі уақытта, 23–29 наурыз аралығында орталықта «Наурыз думан» атты көктемгі тақырыптық ауысым ұйымдастырылған. Ауысымға Егіндікөл, Есіл, Бурабай, Целиноград, Аршалы, Біржан сал аудандары мен Қосшы қаласынан келген 5–7 сынып оқушылары қатысуда.
Бағдарлама мектеп оқушыларының демалыс кезеңіндегі бос уақытын тиімді ұйымдастыруға және Наурыз мейрамы аясында ұлттық мәдени мұраны тереңірек танып-білуге бағытталған.
Сапар барысында Айнагүл Балташева балалармен сұхбаттасып, олардың көңіл-күйі мен демалыс жағдайын сұрап білді. Сонымен қатар лагерьде қызмет көрсетіп жүрген қызметкерлерге балаларға қолайлы жағдай жасап, сапалы қызмет ұйымдастырғаны үшін ризашылығын білдірді.
Сонымен қатар, өңірдің 170-rе жуық оқушысы Бурабай ауданындағы «Балдәурен» және «Звездный» лагерлерінде, сондай-ақ еліміздің оңтүстігіндегі Балқаш және Қонаев қалаларында орналасқан «Балдәурен» сауықтыру орталықтарында демалып жатыр.
