Бүгін Ақмола облысының әкімі Марат Ахметжановтың төрағалығымен өткен облыс әкімдігінің отырысында 2026 жылдың бірінші жартыжылдығындағы өңірдің әлеуметтік-экономикалық даму қорытындылары мен облыстық бюджеттің орындалуы қаралды.
Отырысты ашқан өңір басшысы мемлекеттік басқару жүйесіндегі конституциялық қағидаттардың маңыздылығына және олардың іс жүзінде жүзеге асырылуына тоқталды.
«Біз Конституцияның жай ғана құқықтық нормалар жиынтығы емес, қоғам мен мемлекеттің күнделікті өмірінде жүзеге асырылатын тиімді құқықтық тетік екенін түсінуіміз керек. Баршамыздың ортақ міндетіміз – конституциялық қағидаттарды нақты істер арқылы жүзеге асырып, еліміздің одан әрі дамуы мен өркендеуіне өз үлесімізді қосу», – деді Марат Ахметжанов.
Экономика және бюджеттік жоспарлау басқармасының басшысы Алмагүл Шүгірмақова баяндама жасап, бірінші жартыжылдықтың қорытындысы бойынша облыста негізгі әлеуметтік-экономикалық көрсеткіштердің басым бөлігінде оң өсім сақталғанын айтты. Өсім ауыл шаруашылығы, құрылыс, сауда, көлік және байланыс салаларында қамтамасыз етілген.
Қаржы министрлігінің рейтингіне сәйкес, маусым айының қорытындысы бойынша Ақмола облысы жергілікті бюджетке түсетін салық түсімдерінің өсу қарқыны жөнінен өңірлер арасында бірінші орынға шықты. Көрсеткіш – 117,7%.
«Облысымыз алғаш рет республика бойынша үздік ондыққа енді. Біз бұл қарқынды бәсеңдетуді көздемейміз. Биылғы жылы кірістер көлемін тағы 21%-ға арттырып, 838 млрд теңгеге жеткізуді жоспарлап отырмыз. Ең жоғары өсім қарқыны Жарқайың, Бурабай, Қорғалжын, Сандықтау, Астрахан, Жақсы, Егіндікөл, Целиноград, Шортанды аудандары мен Қосшы қаласында қамтамасыз етілді. Бұл нәтижеге инвестиция тарту және көлеңкелі экономиканы қысқарту бағытындағы тиімді жұмыстардың арқасында қол жеткіздік», – деді Алмагүл Шүгірмақова.
Сонымен қатар облыс әкімі жылдық мақсатты көрсеткіштерге қол жеткізу үшін бірқатар бағыттар бойынша жұмысты күшейту қажеттігін атап өтті.
Отырыста өнеркәсіпті дамыту мәселесіне ерекше назар аударылды. Оң өзгерістерге қарамастан, өңір тоғыз айдың қорытындысы бойынша тұрақты өсімді қамтамасыз етуі тиіс. Марат Ахметжанов жаңа өндіріс орындарын іске қосу мен инвестициялық жобаларды сапалы сүйемелдеу экономикалық өсімнің негізгі қозғаушы күшіне айналуы керектігін, ал жүзеге асырылып жатқан әрбір жоба облыс экономикасына нақты нәтиже беруі қажет екенін айтты.
Сондай-ақ отырыста әлеуметтік-экономикалық даму, бюджеттің кіріс бөлігін орындау және инвестициялық жобаларды іске асыру бағытында оң нәтижелер көрсетіп отырған қала және аудан әкімдерінің есептері тыңдалды.
Отырыс қорытындысы бойынша қала және аудан әкімдеріне жоспарланған нысандарды уақтылы пайдалануға беру, статистикалық есептілік кезеңінде негізгі көрсеткіштерге күнделікті мониторинг жүргізу, бюджет кірістерін ұлғайту, салық базасын кеңейту және халықтың жалақы деңгейін арттыру бағытындағы жұмыстарды жандандыру тапсырылды.
«Әрбір басшының жұмысының тиімділігі облыстың одан әрі әлеуметтік-экономикалық дамуына және өңір тұрғындарының әл-ауқатына тікелей әсер етеді», – деп түйіндеді өңір басшысы.
