Ақмола облысы әкімінің орынбасары Алтынай Әміренованың төрағалығымен сот практикасын талдау, сондай-ақ азаматтық және әкімшілік істер бойынша соттарда мемлекеттің мүддесін қорғау сапасын арттыру мәселелеріне арналған кеңес өтті.
Кеңес барысында Ақмола облысының Мамандандырылған ауданаралық әкімшілік сотының судьясы Гаухар Нұрманова, Ақмола облысы прокурорының аға көмекшісі Надежда Пустовит, сондай-ақ аудандық және қалалық әкімдіктердің, облыстық басқармалардың өкілдері баяндама жасады. Баяндамаларда сот жұмысының жай-күйі, істерді қарау нәтижелері, жол берілген процестік бұзушылықтардың себептері және сот процестерін құқықтық сүйемелдеуді ұйымдастырудағы кемшіліктер қамтылды.
Қатысушылар құқық қолдану тәжірибесіндегі өзекті мәселелерді, орын алып отырған бұзушылықтардың себептерін, сондай-ақ облыстың мемлекеттік органдарының құқықтық жұмысын арттыру жолдарын талқылады.
Кеңес қорытындысы бойынша нақты тапсырмалар берілді. Атап айтқанда, сот актілеріне жүйелі талдау жүргізіп, олардың қабылдануына себеп болған жағдайлар мен себептерді жою бойынша жан-жақты шаралар қабылдау міндеттелді.
Кеңесті қорытындылай келе, Алтынай Әміренова заңнаманы мүлтіксіз сақтау мемлекеттік қызметшілердің негізгі міндеті әрі азаматтардың құқықтарын қорғаудың басты шарты екенін атап өтті. Сондай-ақ Мемлекет басшысы айқындаған «Заң мен тәртіп» идеологиясын ілгерілету бағыты әділетті қоғам құрудың негізі және мемлекеттік органдардың басым міндеті екенін ерекше атап өтті.
